Da giuven ensi ha la musica giugà ina rolla impurtanta en la vita dad Arnold Spescha. Uschia èn la musica sacrala e la musica instrumentala daventads l'emprim ardiment. Pli tard ha Arnold Spescha chattà l'ardiment per musica classica e surtut la tschintgavla sinfonia da Beethoven ha fascinà el e questa «sinfonia dal destin» intganta anc adina el.
L'anteriur professer da lingua a la scola chantunala ha dentant en giuvens onns cumenzà a scriver poesias. Sper l'interess per lingua e cultura ha el en sia lirica er mess en pled ses sentiments, sias ponderaziuns e reflecziuns davart la musica, l'aura e la lingua. Divers cumponists han mess en musica sias poesias.
Muments cun Arnold Spescha
Noss redactur Jürg Gautschi è s'inscuntrà cun Arnold Spescha e raquinta da sias impressiuns:
«Cura che jau hai emprendì d’enconuscher Arnold Spescha, hai jau constatà svelt: el ha fatg uschè bler. Tge duess jau raquintar da tut quai?»
Gia mo ils titels da tut quai che Arnold Spescha ha publitgà dattan ina glista da passa 30 paginas. Tranter auter ha el scrit trais cudeschs cun poesias, la grammatica sursilvana, in cudesch davart il general russ Suworow, nundumbraivlas lavurs davart la lingua, la litteratura, la linguistica, la musica, l’istorgia, l’aura, lura era raquints, recensiuns, artitgels da gasettas, translaziuns ed ultra da quai 135 diaris, mintga saira dapi prest 60 onns.
Plinavant è el stà scolast gimnasial, docent universitar, dirigent, commember da cumissiuns da musica chantunalas e federalas, expert. E bab da trais uffants. E consort. E pastur.
Apunto.
«La fin finala hai jau decidì da tschertgar intgins muments che dattan invistas en ses munds, ses pensar, sias passiuns e ses fastidis»
Las passiuns dad Arnold Spescha: la musica – l’aura – il pled
Las passiuns dad Arnold Spescha èn la musica, l’aura ed il pled. A mintgina da questas passiuns ha el deditgà in cudesch da poesias.
- L’emprim cudesch porta il titel «Ei dat ils muments da pass lev – Zeiten leichtfüssigen Schritts». L’ovra è cumparida il 2007 e sa deditgescha a la musica.
- Il segund cudesch sa numna «Ei catscha dis – der Tag bricht an». El è vegnì publitgà il 2016 e cuntegna poesias cun descripziuns da muments or en il liber, cura ch’ins è exponì a las lunas da l’aura.
Ils onns che Arnold Spescha frequentava la scola primara, l’entschatta dals onns 1950, durava l’onn da scola mo sis mais. Il rest dal temp gidavan ils uffants a chasa. Arnold fascheva il pastur. El pertgirava las nursas, fin ch’ellas gievan ad alp, lura ils vadels ed ils bovs e mintgatant stueva el era gidar sin il funs. Star si stueva el gia enturn las 05:30. Quai saja stà sever, ma era bel, di Arnold Spescha en il film dals Cuntrasts.
«Il pli bel temp era mintgamai la primavaira e l’atun cun las nursas. Là avev'jau bler temp per leger. Jau prendeva cun mai Tschespets, Chalenders Rumantschs. Quai eran savens istorgias che vegnivan translatadas dal tudestg, per part er crimis. Lura capitavi mintgatant che jau aveva tuttenina tema dad ir en il guaud u en il chagliom per tschertgar mias nursas. Anc pli gronda tema ma faschevan natiralmain tun e chametg. Ils creschids avertivan da gea betg ir sut las plantas, lezzas tirian il chametg. Igl ha propi dà muments, nua che jau aveva gronda tema.»
Gia en sia dissertaziun è Arnold Spescha s’occupà cun l’aura. Ella porta il titel «Wind und Wetter, die meteorologischen Erscheinungen im Wortschatz einer Bündner Gemeinde (Pigniu/Panix» (1973).
Il terz cudesch da poesias è cumparì il 2023 e porta il titel «Sinzurs el serein dalla sera – Laute ins Klare des Abends». Questa ovra è deditgada al pled, a la lingua.
Ils fastidis dad Arnold Spescha
Laschar ir, laschar liber. Arnold Spescha è in collectader. Cudeschs, per exempel, ha el collectà senza fin. Ma era plattas, discs cumpacts ed auter pli. En il tschaler da la chasa a Pigniu sa chatta in arcun che cuntegna tut ils placats ed ils programs da tut ils concerts che Arnold Spescha ha visità. «Enturn questa trucca avess jau gugent creà in ulteriur mument filmic, nua che Arnold Spescha ma raquinta da questas regurdientschas ch’el ha vivì en profunda preschientscha ed amur. Ma apunto. In film dals Cuntrasts ha ina lunghezza da mo 25 minutas. Quai è stà mes fastidi», ha ditg noss redactur Jürg Gautschi.
E quel dad Arnold Spescha è da ponderar tge che duai capitar ina giada cun tut questas chaussas. Magari ina gronda sfida, surtut sch’ins sa che Arnold Spescha na po betg bittar davent in sulet cudesch, era sche quel è uschè schlet.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.