Il schaner 1983 è naschì Duri Cathomen a Falera. Ensemen cun duas soras (Heidi e Sonja) ha el passentà ina giuventetgna «musicala» en ses vitg. Ses bab Risch era in fervent musicist en la musica da Falera ed ha dà vinavant l'amur per la musica da sturs a ses uffants. I na fa perquai betg surstar ch'era el ha tschiffà fieu per questa sparta da musica. El ha emprendì cornet ed è sa perfecziunà autodidacticamain, in talent natiral. Ses promoturs sper ses bab eran Albert Düggeli e Roman Caprez (dirigents da la musica da Falera). Sco el ha ditg en in discurs cun RTR ha el dentant er profità da numerus auters dirigents en champs da musica u projects.
Il fenomen
Sias emprimas uras da cornet ha el gì tar ses bab e ses dirigents Albert Düggeli e Roman Caprez. Bainbaud è ses talent per sunar vegnì a la glisch e ses conturn ha promovì el uschè bain sco pussaivel. Sin ses 20avel anniversari han ses geniturs regalà a Duri tschintg uras tar Laurent Tinguely (trumbettist da professiun). Duas da questas uras ha el prendì. Duri è stà dal maini ch'el possia profitar pli fitg sin autra moda. El ha pli gugent registrà sasez e tadlà sasez e lura cumpareglià quai cun cornetists da renum sco Roger Webster, Richard Marshall u er Lydia Stöckli. Cun be duas uras tar in trumbettist da professiun daventar il Principal en ina brass band da la pli auta categoria e quai sur 16 onns è ina prestaziun da vaglia e vairamain fenomenala.
Autas finamiras
Sco giuven cornetist è el entrà en la BML (Bürgermusik Luzern), ina brass band d'emprima qualitad. Là ha el fatg il pass dal quart solocornetist fin al Principal. Quai è stà l'emprim pass da sia gronda finamira: Daventar campiun europeic cun la BML sco Principal Cornet. Il segund pass ha el cuntanschì il 2014 cura che la BML ha gudagnà a Perth (Scozia) la concurrenza europeica da Brass Band. Arrivà a sia gronda finamira na dentant betg franà sias ambiziuns. El ha mantegnì la finamira dad esser in dals megliers aifer la band, quel che sa sco emprim ils tocs da concert u da concurrenza.
Entant è Duri Cathomen maridà e bab da duas figlias e sia famiglia è il motiv principal da remetter ses post sco Principal en la BML. El abita a Bogn Ragaz e gist durant las fasas da concurrenzas cun bleras emprovas ha el fatg pliras giadas l'emna il viadi da chasa a Lucerna ed uschia strusch vesì sia dunna e las figlias. Uss ha la famiglia emprima prioritad. El vul passentar dapli temp cun la famiglia e giudair ella. Er vul el vesair a crescher si sias figlias.
Il cornet metta el uss inpau da la vart, dentant betg la musica. El resta vinavant dirigent da la Societad da musica Falera, «sia» musica da pitschen ensi.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.