Il 1922 èn las duas societads Harmoniemusik Luzern (fundada il 1892) ed il Musikverein Gütsch (fundà il 1905) fusiunadas a la Bürgermusik Luzern. Il 1967 è la societad sa transfurmada d'ina furmaziun d'armonia en ina brass band. Inizià quest pass ha il piunier da brass André Winkler. Passa 10 onns pli tard ha Yves Illi instradà ina regiuvinaziun dals commembers ed uschia pudì meglierar la qualitad musicala da la BML. Il 1982 ha la Bürgermusik Lucerna gudagnà per l'emprima giada la concurrenza da brass band svizra, lura anc en il Kursaal a Berna. Dapi lura sa plazzescha la furmaziun cun ina regularitad constanta sin las emprimas plazzas a questa ed era ad autras concurrenzas. Era il Swiss Open Contest ha la BML gia gudagnà pliras giadas.
Campiun d'Europa
Il pli grond success en l'istorgia da la BML ha ella festivà il 2014. Sco emprima musica svizra ha ella gudagnà a Perth en Scozia il titel da campiun d'Europa e vitiers la distincziun «Best Contest Performance of the Year». D'in total da 200 puncts ha la BML fatg 193 (96 en il toc da pensum e 97 en il toc da pag).
Quest premi è er in pajament per la lavur da scolaziun che la BML fa. Dapi l'entschatta sco furmaziun da brass s'engascha ella per la scolaziun musicala da giuvnas e giuvens. Il 1988 ha ella fundà la band B per garantir uschia ina promoziun da glieud nova per la band A. Gia dus onns pli tard ha quella band cuntanschì in bun nivel d'emprima categoria. A l'entschatta dals onns 90 ha la Bürgermusik Lucerna fundà la concurrenza da solists ed ensembles (LSEW) la Luzerner Jugend Brass-Band LJBB che s'inscuntra dapi lura mintg'onn en in champ d'in emna.
Per ses grond engaschi ha la BML survegnì il 2015 il Prix Walo en la sparta musica instrumentala.
Ed era las furmaziuns giuvnas han success. Ils BML-Talents (l'anteriura band B) han gudagnà il 2014 la concurrenza da SRF «Kampf der Orchester» (cun Luca Hänni) ed il 2019 han els gudagnà sco emprima brass band giuvenila a Montreux il titel da campiun svizzer en l'emprima categoria.
Impressiuns da la gala da concert
-
Bild 1 von 4Legenda: Il settember 2021 ha la BML dà il concert da gala en il KKL a Lucerna. MAD, BML, Dominik Baumgartner -
Bild 2 von 4Legenda: Il register dals instruments gronds en acziun. MAD, BML, Dominik Baumgartner
-
Bild 3 von 4Legenda: Duri Cathomen (sanester) è oriund da Falera ed è dapi intgins onns il principal-cornetist. MAD, BML, Dominik Baumgartner
-
Bild 4 von 4Legenda: Michael Bach dirigia dapi passa 10 onns e cun grond success la BML. MAD, BML, Dominik Baumgartner
Lavur da piunier
Promover la giuventetgna stat en il center da la Bürgermusik (BML-Talents, LSEW, LJBB etc.). En questa sparta ha l'uniun prestà lavur da piunier. Dentant er en autras ha ella agì sco piunier, uschia per exempel il 1991 cura ch'il president da lura, Leo Krucker, ha pudì far in contract da sponsoring cun il constructur d'instruments Yamaha, quai ch'era in novum en la scena da lezzas uras. Il 1996 ha la BML fundà il club da donaturs ed uschia er pudì metter la band sin pes finanzials segirs.
Dapli da la BML
BML ed ils Rumantschs
La Bürgermusik Lucerna è era ina da las emprimas adressas per musicantas e musicants dal Grischun. Uschia ha Corsin Tuor (oriund da Trun) frequentà a Lucerna la Scol'auta da musica ed è entrà sco eufonist en la furmaziun da brass.
Intgins onns è el stà emprim eufonist da la band A, pli tard ha el lura er dirigì la BML band B, ils BML Talents ed er surpiglià incumbensas per la band A. Er grazia a l'engaschi da Corsin Tuor ha la BML registrà il portatun «Pèrlas rumantschas» cun chanzuns rumantschas arranschadas per brass band. Dus ulteriurs discs cumpact da questa retscha ha el registrà cun BBO, la Brass Band Berner Oberland ed er ensemen cun Cantus Firmus e l'Ensemble De Canto.
In autra persunalitad rumantscha è Duri Cathomen. Il musicist oriund da Falera è dapi intgins onns il cornet principal da la band ed ils onns 90 hai era dà ulteriurs musicists rumantschs che han sunà almain per in mument en la BML A u er en la band B.
Dapli
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
L’emissiun preschenta furmaziuns da brass, armonias, fanfaras, musicas militaras, furmaziuns pitschnas ed auter pli.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.