Flavio Bundi (chant) e Remo Derungs (musica instrumentala) han cumponì communablamain l'ovra «Convivenza». In'ovra che sa deditgescha a las cuminanzas Lumnezia, Sursaissa e Val, lur lingua, lur cultura e lur modas da viver. Igl è l'ovra centrala d'in concert che la Musica Giuvenila Surselva ed in chor ad hoc han dà ils 26 d'october 2024 en la halla polivalenta a Vella.
La cumposiziun
La cumposiziun «Convivenza» è per chor e musica instrumentala e cumenza suenter in'introducziun musicala cun ils pleds «Mis Dorf, so ruuch und schö. Miu vitg schi bi pompus.» Bundi e Derungs fan musicalmain in viadi istoric e geografic tras las trais vischnancas. L'ovra ha trais parts che van però ina en l'autra. Il viadi cumenza en la Val Lumnezia, va lura en Val S. Pieder e finescha sin la planira da Sursaissa. Flavio Bundi vul en las chanzuns descriver ils abitadis e Remo Derungs ha cumponì la musica che descriva las vias che mainan e collian quests abitadis. In'ovra moderna e grondiusa che ha fatg grond plaschair ad in grond public a Vella.
Er l'ulteriur program è sa fatschentà cun la cultura da Gualsers sco per exempel la chanzun «Weischus dü?» dad Eugen Meier e cun in text en «Walliser Tiitsch» da Hannes Taugwalder u l'ovra «Calling Cornwall» che Goff Richards ha scrit per Brass Band. Cornwall è la cuntrada il pli fitg en il sidvest da la Gronda Britannia ed ha num per tudestg «Kornwall u Cornwallis».
Durant il concert hai era dà intermezzi nua ch'il publicum ha pudì guardar differents videos curts, sequenzas divertentas e contemplativas nua che persunas dal chor ad hoc han raquintà da lur impressiuns, experientschas e relaziuns cun persunas dals auters abitadis. Lumnezianas e Lumnezians han raquintà co els han cun ils da Val e cun ils da Sursaissa e viceversa.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.