Ella passa en ils fastizs da Nemo: Zoë Më va per la Svizra al Eurovision Song Contest 2025 a Basilea. La giuvna da 24 onns vegn a chantar la chanzun «Voyage». En quella ballada vul ella envidar a la glieud sin in «viadi per dapli umanitad», ha ella ditg envers SRF. Quai fa ella cun ina chanzun che cumenza ruassaivel e fin, e sa avra lura en il refrain. Er en il text da la chanzun sa mussa il messadi – per exempel cun «las fluras èn pli bellas sche ti das aua» enstagl da tagliar giu ellas.
Il redactur da musica da RTR, Dominic Pohle, davart la chanzun «Yovage» da Zoë Më:
Voyage da Zoë Më regorda vid ils chansons da las entschattas da l’ESC. La chanzun cumenza fin e reducì, be cun la vusch da la chantadura ed il clavazin. Pass per pass suondan violinas e backing vocals enfin ch’ella s’avra accumpagnà d’in orchester. La vusch da Zoë Më resta dentant adina fina e fragila e perda tuttina mai preschientscha en l’arranschament.
Tar l’ESC tutga in pau vitiers che las chanzuns ed acts provocheschan. Per l’ediziun da quest onn para quai d’esser anc pli fitg il cass. La chanzun da Zoë Më è autra – quai che pudess esser tant in avantatg, dentant er in disavantatg per ella.»
La ballada è scrita cumplettamain per franzos – quai che fa in pau surstar. En sias chanzuns chanta Zoë Më savens per franzos e tudestg, gugent porscha ella schizunt ina cumbinaziun e nizzegia omaduas linguas en il medem toc. Ella gioga cun las linguas e las melodias da las linguas, puprogna e dumonda las ureglias da las audituras medemamain. Mintgatant en songs da pop da poesia, mintgatant cun balladas plain sentiment.
Saut sin il foss da la rösti
En sasez n'è franzos gnanc la lingua materna da la scolasta da professiun. Naschida è Zoë Më a Basilea – la citad ospitanta dal ESC – ed ha lura fatg midada cun la famiglia en Germania. Cun nov onns èn els lura turnads en Svizra, en il chantun da Fribourg, nua ch'ella abita anc oz e nua ch'ella ha emprendì la lingua.
Questa stad ha ella er anc gigs al festival dal Gurten a Berna sco er al Lakelive a Bienna. Ma l'emprim vai a Basilea a la pli gronda concurrenza da musica dal mund.
