Il Museum da la natira dal Grischun a Cuera è per duas grondas attracziuns pli ritg. La fundaziun ch’è en possess da las collecziuns dal museum ha numnadamain cumprà dus belleza clutgers da quarz da fim ch'il chavacristals Giusep Venzin da Fuorns e Werner Burger han scuvert.
Chattà han Venzin e Burger ils cristals il 1958 en il territori da La Bianca entadim la Val Cristallina en Val Medel. En il furn avevi quatter clutgers da radund in mez meter lunghezza. Ils dus clutgers, ch’èn vegni cumprads da la Fundaziun collecziun Museum da la natira dal Grischun, èn stads avant en possess da la famiglia dal chavacristals Giusep Venzin-Bearth ch’è mort l'onn 2020.
