Cun plirs preparats, films e gieus interactivs dat l'exposiziun dal Museum da la natira dal Grischun in'invista en pliras tematicas en connex cun il giat. Flurin Camenisch, il pedagog dal museum di che l'agilitad dal corp e las furmas da communicaziun dal giat vegnian tranter auter preschentadas.
Igl è bel d'avair in'exposiziun davart in animal da chasa, per era pudair discurrer davart la domesticaziun.
Il giat na saja betg vegnì domestitgà activamain da l'uman. Las emprimas provisiuns da graun hajan attratg mieurs e cunquai lura era giats.
-
Bild 1 von 4Legenda: L'exposiziun cuntegna plirs exponats, films e gieus interactivs. RTR -
Bild 2 von 4Legenda: Flurin Camenisch declera las funcziuns da las parts dal corp dal giat. RTR
-
Bild 3 von 4Legenda: L'exposiziun tracta pliras tematicas en connex cun il giat – tranter auter ses nutriment. RTR
-
Bild 4 von 4Legenda: Ueli Rehsteiner, directur dal Museum da la natira dal Grischun e Flurin Camenisch, pedagog dal museum. RTR
Influenza sin la biodiversitad e basa per superstiziun
Betg mo las bellas varts dal giat sco animal charin vegnan preschentadas, mabain era per exempel sia influenza sin la fauna. Tenor Flurin Camensich datti paucs studis che defineschan cleramain la situaziun, i saja però cler che l'animal da rapina influenzeschia la fauna.
L'exposiziun oriunda è vegnida concepida dals museums da la natira da la Turgovia e dad Olten. Il museum da Cuira l'ha cumplettà cun in giat mumifitgà dal Grischun. L'exponat declera ch'ins chattia per part giats morts en paraids u palantschieus. Ils animals na sa chattian betg adina mo là per casualitad, mabain per part era pervia da motivs superstizius: Ins carteva che sch'ins laschava entrar sco emprim in giat en ina chasa nova, prendia quel si tut il discletg.
Motivs per popularitad
Flurin Camenisch suppona ch'il giat è l'animal da chasa il pli popular, perquai ch'el ha pliras fassettas.
Il giat è selvadi, ma tuttina charin e di sez a ses patrun u a sia patruna tge ch'el vul.
L'exposiziun duessia mussar il giat sco individi e declerar ses basegns. Il pedagog da museum recumonda a tuts e tuttas da visitar l'exposiziun – tuttina sch'ins haja in giat da chasa u betg.
Or da l'archiv: