Per la prima giada insumma datti ussa en il museum d’art a Cuira in’exposiziun che mussa be ovras che Giacometti ha fatg da giuven – ovras per part mai mussadas. Questa exposiziun è da vesair tranter ils 19 d'avust ed ils 19 da november 2023 en il museum d'art a Cuira, sco igl è scrit en ina communicaziun.
L'exposiziun duai mussar vid tge ch'il artist giuven è s'orientà da quest temp e quant stretg ch'el ha lavurà ensemen cun ses bab Giovanni Giacometti e co el ha plaunsieu sa deliberà dad el. Plinavant vegn dentant er mussà co el ha malegià ses ambient persunal, sco per exempel en sia famiglia, a Stampa, durant la scola a Schiers, a Genevra, ed a Roma.
En quest temp ha dentant er cumenzà sia confruntaziun intensiva cun ovras da l'istorgia d'art. Alberto Giacometti daventa conscient da sia rolla sco artist. Quai mussa el en purtrets dad el cura ch'el aveva 15 onns. Plinavant mussan quai er ils purtrets che ses bab Giovanni Giacometti ha malegià dad el.
L'exposiziun «Alberto Giacometti. Purtret d'in artist sco um giuven» sa fatschenta cun las ovras nua ch'el aveva 12 onns e va fin ses emprims onns a Paris, cura che Alberto Giacometti ha realisà sias emprimas exposiziuns.
