Tar Marian Gort vegnan persunas cun problems: cun temas, conflicts da relaziuns, da quels che vulan chalar da fimar ni prender giu. Ed er persunas che sa sentan betg segirs da sasez ni ch’han traumas.
Sch’i fa clic tar clientas e clients, quai ma dat bler.
En l'ipnosa va l'ipnotisadra en il subconscient, en las emoziuns d'ina persuna. Qua possian ins gidar spert. Il trenament mental ston in trenar, quel dovra pli ditg, di Marian Gort en il profil. Cun quai ch’ella fa uss, saja ella pli datiers da sasezza. Sco trenadra mentala ed ipnotisadra survegnia ella fitg bler da la glieud, malgrà che las persunas vegnan cun problems tar ella.
En ses temp liber ha Marian Gort fatg bler sport: mountainbike, skis, snowboard, inline skates, trampolin, parasgular.
Jau sun ida al limit, ina fugia da mamezza e da quai ch’jau hai davos mai.
Marian Gort è malgrà legastenia vegnida scolasta primara. Pervia da si'uffanza betg adina simpla ha ella gì in muster en ella. Quai muster ha ella laschà analisar en la ipnosa.
Jau sun stada uschè fascinada tge ch’è schabegià cun mai en la ipnosa. Ed jau vuleva er savair far quai.
Creschida si è Marian Gort a Rueun en ina famiglia cun otg fragliuns. Ella era la mesauna a naschida dus mais memia baud. Perquai vegnivia ditg ad ella a chasa ch’ella saja tuppa.
Jau era uschè gronda sco in paun da 500 grams. Jau aveva 1300 grams e 44 cm. Propi pitschna.
Marian Gort ha gì ed ha anc oz anc problems cun leger. Ella è legastenicra. Oz survegnan uffants cun legastenia agid. Cura che Marian Gort ch’ha uss 55 onns è ida a scola, savev’ins anc betg exact tge che quai è. E tuttina ha ella fatg il seminari da scolastas a Cuira.
Nagin n’ha percorschì ch’jau sun legastenicra. Leger era adina in stress.
Sco scolasta primara ha Marian Gort perquai gì gronda chapientscha per uffants ch’avevan problems en scola. Ella ha adina mussà il positiv, quai ch’è stà bun.
