La musica ed il chant sa tiran sco in fil cotschen tras la vita da Ladina Simonelli-Zisler. La dirigenta dal Cor mixt da Champfèr e da Las Filomelas da Samedan giauda la lavur tant cun creschids sco er cun uffants. La batgetta dal cor d’uffants «Las Filomelas» dat la Samedrina giu questa stad.
Per mai è quai segir in mument ferm emoziunal. Dentant sun jau loscha d’avair pudì lavurar cun ils uffants e giuvenils durant passa otg onns.
Sco magistra lavura la dunna sportiva en in pensum da 50 % a la scola primara a Samedan. Dapi ch'ella dat scola saja sa midà bler. Ella n'è perquai er betg segira sch'i manca cul temp l'energia ed er la pazienza da lavurar cun uffants e quai enfin ch'ella va en pensiun. Il temp liber che resta – sper ils dus cors – passenta Ladina Simonelli-Zisler il pli gugent or il liber giugond a golf, sin pista u en lur chasina a Lai da Como en Italia.
Creschida si è ella sco unic uffant en l’affar famigliar da la furnaria Zisler a Samedan. Cuntinuar cun la tradiziun ed emprender furnera u pastiziera na saja betg stada in’opziun per ella. Fatg sez turtas da nusch per la marca «Zisler» ha ella dentant er gia ils ultims onns.