Ils campiunadis mundials da freestyle en Engiadin’Ota furman la finiziun da questa stagiun d’enviern cun las cursas tranter ils 17 e 30 da mars. Ferm quint dad esser da la partida sco atleta fa er Larissa Gasser da Madulain. La snowboardista ch'è en il cader A da Swiss Ski, cumbatta fin l’ultim di per ina da las quatter plazzas da partenza che stattan a disposiziun tar las dunnas. La decisiun vegnia tratga pir l’ultim mument. Il plaschair da pudair cumbatter per medaglias sin la Corviglia sur San Murezzan al medem lieu nua ch’ella è stada l’emprima giada cun 5 onns sin l’aissa, la fetschia in plaschairun.
Arda il fieu per il campiunadi gia?
Sco atleta activa ed er ambassadura dals campiunadis mundials da freestyle en Engiadina, enconuschia Larissa Gasser tuttas duas varts. Il plaschair e l’euforia che l’eveniment ha lieu en Svizra, dentant er vuschs criticas che na crajan betg anc vi dal eveniment. Ch’i dovria simplamain ina buna sbrinzla ch'envida il fieu en val, è Larissa Gasser persvadida. E decisiva vegn ad esser l’aura per ina «WM» da success.
Jau ves il campiunadi mundial da freestyle en Engiadina sco ina gronda schanza. Igl è er ina sort da turnar a chasa, cunquai ch’ils emprims campiunadis en Svizra dal 1985 avevan er lieu a San Murezzan.
Er la data da las cumpetiziuns sportivas la fin da la stagiun d’enviern vesa Larissa Gasser sco grond avantatg. Saja a reguard alloschis, ma er per survegnir l’attenziun meritada, suenter il campiunadi da biatlon u er il Maraton da skis engiadinais.
Ina dira via enavos
Che Larissa Gasser è oz sportista activa tar Swiss Ski na sa declera betg da sasez. Ella ha numnadamain gì dad ir tras in temp fitg difficil suenter in grev accident l’onn 2017. Durant il campiunadis mundials da las junioras en la Tschechia è ella sa blessada fermamain. La diagnosa: in ferm squass dal tscharvè e donns vi dal sistem da gnerva vegetativ. Las consequenzas sajan stadas nundumbraivlas e fitg pesantas en ses mintgadi, uschia la sportista engiadinaisa. En consequenza è Larissa Gasser crudada or dal cader da Swiss Ski.
Jau n’enconuscheva betg pli mes bab u mes frar. Tut era ester per mai e jau n’aveva pli nagins sentiments d’empatia.
Suenter quatter onns intensivs da reabilitaziun, tranter auter er cun patratgs da suicid, ha Larissa Gasser puspè chattà la via enavos sin pista, cun agid da famiglia ed amis, e cuntanschì il nivel da pli baud. La finamira saja da gudagnar ina medaglia als campiunadis mundials da freestyle en sia patria.
Or da l'archiv: