Ozendi è il Servetsch Social Internaziunal (SSI) preschent en da quai da 120 pajais. Circa 600 persunas dal fatg fan part da questa rait e s’engaschan di per di per ils dretgs individuals d’uffants, famiglias e migrants.
Tar sia fundaziun il 1924, sustegneva il SSI cunzunt migrantas e migrants che partivan per ils Stadis Unids da l’America. En il decurs da l’istorgia ha quest servetsch lura dentant surprendì anc autras funcziuns en connex cun persunas en situaziuns transnaziunalas cumplitgadas, ed ozendi stat la maioritad dals cas en connex cun la protecziun da l’uffant.
Ils destins da las persunas che nus accumpagnain èn pli impressiunants che mintga ficziun.
En tge cas ch’il Servetsch Social Internaziunal intervegn? En general, en situaziuns transnaziunalas difficilas, cunzunt sch'in uffant è en privel. Per exempel sch’in uffant vegn rapinà dad in genitur e manà en in auter pajais, quai senza che l’auter genitur saja d’accord. U sch’insatgi dovra documents or da ses pajais d’origin en il qual el na po betg turnar. Ubain sch’insatgi è vegnì adoptà or da l’ester e vuless ussa chattar sia famiglia biologica. U era sch’in pèr binaziunal vul sa separar e ch’i dovra ina mediaziun per sclerir nua ch’ils uffants duain restar.
La filiala Svizra dal SSI ha l’onn passà tractà da quai da 1’500 cas, e per mintgin da quels emprovan las collavuraturas da chattar ina soluziun sin mesira. En la Marella raquinta la directura dal SSI Svizra, Cilgia Caratsch da la lavur quotidiana, ed era da cas che han commuventà ella persunalmain. Ultra da quai ans raquintan era persunas ch’han survegnì agid dal SSI in fragment da lur istorgia.
Nus dain in cuc davos las culissas, explitgain e mettain en context, sajan quai fenomens novs, u istorgias pac enconuschentas.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.