Ensemen cun manaschis partenaris scolescha «La Capriola» giuvenils cun basegn da sustegn. Quai temp supplementar ch'ils giuvenils dovran per reussir en lur emprendissadi na sto betg il manaschi purtar. Questa lavur fa «La Capriola» che va en las fatschentas e mussa per exempel da tagliar endretg charn, co servir vin u co la cassa funcziuna. Uschia survegnan ils giuvenils cun handicap la schanza da far in emprendissadi sco auters era. Els n'èn betg avisads sin in plaz da lavur protegì.
Nus essan en in dilemma: dad ina vart il martgà da lavur real che di tge ch’el vul. Da l’autra vart la situaziun dals giuvenils ch’han in handicap. I dovra perquai structura per ch’ils giuvenils survegnan orientaziun per chattar sasez.
«La Capriola» ha la rolla dad in coach u accumpagnader spezial per giuvenils cun impediments cognitivs u adina dapli era psichics. Ella sa gida en il mintgadi da lavur, ma dat er sustegn durant il temp liber. In aspect impurtant per la lavur cun ils giuvenils cun handicap è la confidanza. Dar confidanza è impurtant. Bain savend che quella vegn per part er nizzegiada ora.
Il mument che la confidanza vegn ruta dastg’ins er dir quai.
Pledentar insatge negativ na vul betg dir ch’jau na stim betg la persuna. Ma sche ti poss regalar confidanza poss ti stgaffir ina basa per lavurar, di Conrad Cadonau.
In grond problem en la pedagogia ed en il sectur social è ch’ins na ristga betg da dir Na u da pledentar fatgs. Ma igl è impurtant da tematisar sch’insatge na cuntenta betg u n’è betg suffizient. Quai è er ina realitad en la vita.
Cun guntgir problems na fan ins in servetsch a nagin.
Datti da la segirada d’invaliditad il dretg sustegn? Conrad Cadonau di che l’investiziun en giuvenils porta a lunga vista ed er economicamain bler dapli che spargnar. «La Capriola» ha fatg in studi ch’ha mussà che l’investiziun en giuvenils sa paja. Ils giuvenils èn autonoms e pajan taglia e na dovran pli tard nagin agid pli. Da spargnar èsi là nua che la bunaveglia n’exista betg, nua ch’il giuvenil na vul betg.
Mintga furmaziun en Svizra è in'investiziun.
Pli baud eri giuvenils cun in handicap cognitiv che duvravan sustegn d’emprender. Per gronda part sustegn «La Capriola» uss persunas cun problems psichics.
La Capriola
