«La Capriola» gida giuvenils cun in impediment da far in emprendissadi per en il futur pudair lavurar en il martgà da lavur. Pli baud eri giuvenils cun in handicap cognitiv u che duvravan sustegn d’emprender, di Conrad Cadonau, il manader da «La Capriola» en il Profil. Per gronda part hajan els uss cas psichics.
Ils cas psichics èn fitg interessants. Cura ch'i va bain cun ils giuvenils poni far la lavur excellent. Grev è, ch’i po dad in mument sin l’auter sa midar uschia ch’i na va nagut pli.
La lavur da «La Capriola» è da sustegnair ils giuvenils e da mantegnair els en il process da lavur. Per sia lavur sco manader da «La Capriola» dovri empatia. Ma ins sto er savair cura esser consequent e star tar las decisiuns.
Quai è forsa in dun ch’jau hai. Jau ma lasch savens sin l’intuiziun.
L’intuiziun è impurtanta per la lavur che Conrad Cadonau fa. Cura esser dir e consequent. E cura èsi il mument da prender insatgi en bratsch. «Na, bain jau sun uschè in», di Conrad Cadonau da Sagogn sin la dumonda sch’el saja in bunatsch. Ma el na pachetescha betg be en vatta.
