Movis - Saut e moviment sin il palc a Mustér

Acrobatica, saltos, flickflacks, rodas, posamauns, spagats, hiphop, elements da salsa ad anc bler dapli haja dà da vesair la fin d'emna passada en la halla Cons a Mustér. L'uniun da moviment, saut e gimnastica d'art ha preschentà in program vast e variant.

Babs e mammas, tats e tattas, augs ed ondas amis ed amias, tuts èn rivads a Mustér per giudair las preschentaziuns da las nov differentas gruppas. Mintga pass e moviment è coordinà, ils costums varieschan tar mintga nova gruppa che vegn sin il palc e sa mova e sauta tar la pli differenta musica. Las pitschnas en rassas alvas ni costums da mieurs che vegnan per il chaschiel, gazellas a liuns en la steppa da l'Africa ed ina gruppa sauta perfin cun parasols. .

MOVIS en acziun

Crescha ad in crescher

Movis creschia ad in crescher, di Esther Hendry che aveva fundà Movis il cumenzament dals onns 2000. Tar las emprimas preschentaziuns saja anc il public stà sin tribuna e la preschentaziun en halla – oz è quai viceversa. Per part sajan schon ils uffants da commembras er schon sin tribuna, quasi la segunda generaziun dals Movis.

Musica live sco highlight

Da piclar or in highlight saja grev, en sasez saja mintga producziun d'ina gruppa in highlight, mintga producziun haja sia furma, ses esser e mintgina da las mussadras dettia propi tut ed anc dapli ch'il funcziunia. Quest onn haja dà ina chanzun live sin il palc. Numnadamain ha Anna Tuor da Mustér preschantà sia chanzun «Strong» ch'ella aveva fatg sco lavur da matura. La coregrafa Anja Klittich ch'è scolasta en claustra da Mustér ha fatg la coreografia vitiers. In mument spezial, per il public ed er per Anna Tuor.

Er il proxim onn pon ins sa legrar sin preschentaziuns impressiunantas da dals differentas gruppas da saut, acrobatica e gimnastica da MOVIS, las preparativas per il proxim onn sajan schon quasi finidas per la partenza di Esther Hendry.