La band da scola «Flat Irons» da Cuira sa participescha a l'Eurovision School Song Contest. Cun sustegn da la Scola da musica da Cuira ha la band inoltrà in video. En quest video preschenta ella in cover dal classicher dad Amy Winehouse «You Know I'm No Good» da l'onn 2007.
Qua pudais Vus votar per vossa band da scola preferida. Ils «Flat Irons» èn da chattar en la categoria da 16 fin 19 onns.
Tgi èn ils «Flat Irons»?
«Flat Irons» en il local da band da la Scola chantunala grischuna
-
Bild 1 von 3. Alya Boons al microfon, Daniele Grigoli a la battaria, Nikita Gähwiler a la ghitarra electrica e Fabiano Grigoli al saxofon. Bildquelle: RTR.
-
Bild 2 von 3. Ozni Sharon Vincent al bass, Sasha Billoquet al microfon e Victoria Prudêncio Tomé a la ghitarra electrica. Bildquelle: RTR.
-
Bild 3 von 3. Robin Rhyn al clavazin. Bildquelle: RTR.
La band è vegnida furmada dad Andi Schnoz e Giulia Gasser (Julie Fox) da la Scola da musica Cuira. Il num da la band «Flat Irons» saja in insider tranter ils giuvenils. Ils commembers han tranter 14 e 19 onns e fan enorm gugent musica da pop, rock e jazz ensemen.
Fin avant pauc temp avain nus fatg covers da chanzuns enconuschentas, nus avain dentant cumenzà a scriver sezs chanzuns.
Flat Irons a l'Eurovision School Song Contest
Passa 100 bands da scola sa participeschan a l'Eurovision School Song Contest. En duas categorias da vegliadetgna tscherna l'emprim il public e lura ina giuria las gruppas da scola preferidas da la Svizra. Las quatter gruppas victuras sa preschentan live ils 14 da matg 2025 en il program accumpagnant da l'ESC a Basilea, sin il European Square. La meglra band da la preschentaziun survegn in invit en l'emissiun «Punkt CH» dad SRF 3.
Tut quai è ina gronda schanza per nus sco pitschna e giuvna band.
Per la band vai per l'aventura ed il divertiment. Ina victoria fiss natiralmain ina narradad.
Ina victoria fiss mega coola e ma muntass bler, ma gia che nus dastgain esser da la partida è cool e nus emprendain gia bler nov.
Ils victurs dal voting public survegnan il resultat la fin d'avrigl. Ils 8 da matg suonda la communicaziun da las quatter bands victuras dal voting da la giuria – che vegnan alura a sa preschentar ils 14 da matg a Basilea.