Gabriella Sonder-Dosch è gia baud vegnida en contact cun il yoga. Sco matta ha ella vis in um a far exercizis da yoga – onns pli tard ha ella fatg la scolaziun, ha instruì enfin avant curt. Ussa fa ella yoga per sasezza – mintga di.
Il siemi da la surmirana fiss dad ir ina giada per in temp en in ashram – in lieu tradiziunal per meditar e pratitgar. In stuair far quai per esser cuntent na saja quest siemi dentant betg, tradescha la mamma da trais uffants e tatta da quatter biadis. Pertge ch’ella è daventada gia avant 40 onns vegetariana e pertge ch’ella ha adina fatg pli gugent fain e las lavurs en iert ch'esser en stalla e pertge ch’ella n'ha atgnamain betg stuì s’emancipar, raquinta ella en il Profil.
