Suenter ses studi d’economia da manaschi a Cuira è Fabian Collenberg vegnì elegì sco chanzlist communal a Sumvitg, quai cun be 23 onns. Uss, 10 onns pli tard, è el sa decidì per ina nova via, ina nova sfida. La stad mida el tar l’interpresa Curia sco cussegliader da vischnancas. Dasperas fa Fabian Collenberg anc politica e fa part a la partida Il Center. Dapi il 2022 è el era deputà en il Cussegl grond a Cuira.
Cun 23 onns n'aveva jau anc betg gronda experientscha e sco nov chanzlist è quai stà ina pulita sfida. Jau hai però gì grond sustegn, uschia che quai è ì detg pulit.
Sin in chanzlist communal spetgan bleras sedutas, cunzunt sedutas da suprastanza. «Jau hai il cletg che quellas èn mintgamai il glindesdi, lura cura ch’i na vegn betg gieus da la Champions League», uschia Fabian Collenberg, er in grond fan dal ballape.
Durant ses uffizi sco chanzlist communal ha il giuven da Cumpadials tranter auter era dastgà collavurar tar la festa da l’elecziun da Martin Candinas sco president dal Cussegl naziunal, insatge ch’el na vegnia mai ad emblidar.
La politica ha adina interessà
Cumenzà a s’interessar per la politica ha Fabian Collenberg gia baud. Il 2014, suenter ses studi, è el lura daventà suppleant tar la partida Il Center, da lezzas uras la PCD Cadi. Pli tard ha Collenberg era presidià durant sis onns la partida giuvna. Il 2022 suonda il pass en il Cussegl grond.
Per ch’i na dettia betg in mantun pendenzas stoss jau lavurar effizient e structurà, per uschia era dumagnar tut sut in tetg.
In’influenza d'entrar en quest mund politic haja gì era Martin Candinas, di Fabian Collenberg. Mo el n’haja atgnamain nagins siemis politics, i fiss dentant bel d’anc vegnir elegì l’onn proxim per in’ulteriura perioda en il Cussegl grond.
Il ballape na dastga betg vegnir a la curta
Ina gronda muntada en la vita da Fabian Collenberg ha er il Club da ballape Trun/Rabius. Dasper esser giugader da la segunda equipa ha el anc surpiglià il post da cassier da l’uniun. Avant ha Fabian Collenberg era trenà pliras equipas da juniors, quella da las giuvnas sco era l’equipa da la 5avla liga, ed el è era stà durant dus onns il cau da juniors.
Il schal dal CB Trun/Rabius na dastga sa chapescha betg mancar en mes biro.
Fabian Collenberg appreziescha cunzunt era la collegialitad cun ils congiugaders ed ils fans che vegnan mintgamai las dumengias a Pustget per mirar ballape. Esser ina part da quest club saja insatge fitg bel. Per restar fit va il chanzlist da Sumvitg era savens a currer, cun velo u sin loipa. «Il sport dat a mai l’equiliber en la vita», uschia Fabian Collenberg.
Or da l'archiv: