Il film dals Cuntrasts «Ester Poly – Sin via en Tunesia» è in film rumantsch nunusità che maina davent da la muntogna grischuna a la Mar Mediterrana al nord da l’Africa, en la medina araba. Il film accumpogna las duas musicistas Martina Berther e Béatrice Graf sin lur turnea en la scena da cultura alternativa da la Tunesia che s’engascha malgrà las repressiuns politicas per ils dretgs da las dunnas e per la diversitad queera. La Tunesia ha dapi la Primavaira araba fatg tras ina gronda avertura per la communitad LBGQI ed è la il sulet pajais arab cun in festival da film queer. Ils davos onns è quest process stagnà pli e pli ferm.
Autras persunas scrivan in diari, jau fatsch sight-seeing cun mes simpel equipament da registrar tuns. Simplamain tadlar co in lieu tuna.
La band feministica Ester Poly cun Martina Berther e Béatrice Graf exista dapi 10 onns. Las ragischs da lur band èn l’improvisaziun libra, l'«instant composing». Il film sfunsa cun ellas en lur improvisaziuns cun objects chattads ed a la tschertga da novs tuns e suns en l'ester. Il film raquinta era da las midadas per la band. La bassista Martina Berther vul sper la forza explosiva dad Ester Poly prender dapli spazi per suns pli calms.
In mez onn suenter la turnea en la Tunesia, l’avrigl 2024, cumpara lura era lur emprim solo-album «Bass Works. As I Venture Into» ed era Béatrice Graf ha publitgà l'onn passà ses album da solo «chansons & more».
Il film è in statement per solidaritad da dunnas e per diversitad linguistica, culturala e sexuala.
Il 2022 emprenda l’autura dal film Manuela Steiner ad enconuscher la band Ester Poly. Spert è per ella cler ch’il duo Martina Berther e Béatrice Graf porschan ina schanza per realisar in film rumantsch cumplainamain divers. In film che discuta temas actuals sco il feminissem, musica ed indentitad queera.
Or da l'archiv:
Martina Berther dad Ester Poly sco Frida Stroom
