Suenter che l'entir comité dal festival era sa retratg suenter l'ediziun 2024 n'era betg cler sche e co ch'il festival cuntinuescha. Ussa ha l'Uniun per la Litteratura communitgà ch'i dat in avegnir e ch'i dat midadas. Ina da quellas è ch'ils proxims Dis da litteratura (1 e 2 da november 2025) n'han betg lieu sco tradiziunalmain a Domat mabain a Cuira en la Postremisa.
Nus avain prendì la decisiun cun cor grev.
Il motiv principal per midar a Cuira è ch'ins possia nizzegiar en la Postremise l'infrastructura tecnica, gastronomica e mediala al lieu. Quai cuntrari a Domat – l'organisaziun da l'infrastructura en la halla polivalenta saja intensiva a resursas persunalas e finanzialas, scriva l'Uniun da litteratura.
La vischnanca burgaisa da Domat è naturalmain fitg trumpada da questa decisiun.
L'uniun deplorescha ch'ils Dis da litteratura bandunan Domat cunquai ch'igl era il lieu da l'occurrenza dapi la fundaziun il 1990 e ch'i haja adina dà grond sustegn da la vischnanca politica e burgaisa, uschia er la concurrenza dal Premi Term Bel ch'era vegnida finanziada da la vischnanca burgaisa.
Persuna cun in mandat pajà
Suenter ch'i n'è betg reussì da chattar persunas per la suprastanza è l'uniun vegnida a la conclusiun ch'i dovra er midadas organisatoricas. Dad organisar in festival da talas dimensiuns sin basa voluntaria, pia senza remuneraziun u cun remuneraziun simbolica, na saja oz betg pli pussaivel.
Perquai datti da nov - cun la persuna da Gianna Duschletta - ina manadra da project cun in mandat pajà. Plinavant scriva l'Uniun per la Litteratura Rumantscha che diversas persunas or da la scena litterara rumantscha e da la suprastanzas sajan prontas da s'engaschar en ina gruppa da program che sustegnia la manadra da project.
Or da l'archiv