En il fratemp è la halla Tircal scuada, las sutgas messas l'ina sin l'autra en salv, ils placats pendids giu ed ils cudeschs enavos sin las curuna da cudeschs. Ils 42avels dis da litteratura èn istorgia. Nus laschain reviver els anc ina giada per Vus cun in potpurri d'impressiuns.
-
Bild 1 von 9. Il public en halla Tircal. Bildquelle: RTR.
-
Bild 2 von 9. Bildquelle: RTR.
-
Bild 3 von 9. Jessica Zuan prelegia or da ses cudesch «Launa da pavagls». Bildquelle: RTR.
-
Bild 4 von 9. Bildquelle: RTR.
-
Bild 5 von 9. Elmar Deflorin e Benedetto Vigne. Bildquelle: RTR.
-
Bild 6 von 9. Simea Widmer suenter la prelecziun da «Supergiat». Bildquelle: RTR.
-
Bild 7 von 9. «Üna sbrinzla – üna grotesca otalpina». Jonathan Ferrari, Annina Sedlacek, René Schnoz, Marietta Jemmi e Felicitas Heyerick. Bildquelle: RTR.
-
Bild 8 von 9. Jürg Gautschi prelegia or da ses nov cudesch «Cunterfem». Bildquelle: RTR.
-
Bild 9 von 9. Discusiun tranter Asa Hendry, Gianna Olinda Cadonau, Annetta Ganzoni, Marietta Cathomas Manetsch e Sabrina Bundi. Bildquelle: RTR.
L'emprim di
Lantschads èn ils Dis da litteratura da quest onn vegnids venderdi saira cun duas occurrenzas. Sper divers pleds d'avertura hai dà comedy e satira da e cun Michel Decurtins e sia «RTR – la show».
Tge ch'è normalmain in format da video online, è venderdi per l'emprima giada vegnì preschentà live avant public. A fin è l'emprima saira ida cun musica da la chantadura Paula Mia Cadonau.
Segund di
La sonda en damaun è stada deditgada cumplainamain a la litteratura rumantscha. Cun duas vernissaschas ed il format «Sfegliar e discutar» nua che trais persunas ord la scena culturala rumantscha han discutà da l'emprim roman «Feuerlilie» da l'autura engiadinaisa Gianna Olinda Cadonau e da la retscha da comics «Il Crestomat».
Sche la tribuna è libra per ina e mintgin che ha gust da preleger ses text alu èsi temp per «La pagina». La suletta regla: il text na po betg esser pli lung che ina pagina A4. Il program alternativ dal Premi Term Bel che ha lieu mintga dus onns. Ed è puspè en roda il 2024.
Il motto dals Dis da litteratura era quest onn «corps». Els eran il fil cotschen che han manà tras las occurrenzas. Uschia er tar la discussiun tematica sur da «diversitad ed inclusiun» en la litteratura rumantscha che ha procurà per material per ponderar e reflectar.
Per il divertiment da la saira ha procurà Benedetto Vigne. El ha concertà ensemen cun collegas musicistas e musicants e festivà uschia ses nov album e cudesch «Melodias da mi'tatta». Tgi che n'ha anc betg gì avunda, ha gì la pussaivladad da star suenter da cumpagnia en la bar litterara. Ils davos hajan bandunà la halla Tircal a Domat la notg a las 02:00.
Terz di
Dumengia – il terz e davos di han era las auturas ed auturs dad oz e dumaun e lur ovras survegnì in spazi. Ellas ed els han prelegì texts scrits per la concurrenza «Plema d'aur/Pled pierla». Passa 440 texts eran vegnids inoltrads, set dad els èn vegnids preschentads a Domat. Ed uffants era er la gruppa en mira dal cudesch tematic «Nous fundain ina famiglia», in cudesch da scleriment che declera cun bleras illustraziuns da nua che las poppas ed ils pops vegnan.
La davosa occurrenza dals Dis da litteratura 2023 era deditgada al teater. Il toc «Üna sbrinzla - üna grotesca otalpina» raquinta d'ina vischnanca muntagnarda, che cumbatta cun la depopulaziun e povertad ed in investur che vuless transfurmar il vitg en in paradis da vacanzas.