«L’orgla n’è betg la part principala en ina baselgia, sia funcziun gioga dentant ina impurtanta part en la liturgia», di Anna-Maria Schlosser. Passa 48 onns lascha la magistra da clavazin en pensiun traglischar ils tuns da l’orgla da la baselgia parochiala a Glion. Dumengias ordinarias, festas ecclesiasticas, e fitg savens era tar sepulturas.
Il pli bel saja da sunar per las grondas festas ecclesiasticas da l'onn. Per ella saja dentant era il temp da preparaziun sco la curaisma avant Pasca u l'Advent avant Nadal temps prezius dal pugn da vista musical.
Betg tut las dumengias èn gloriusas a l'orgla. Ma mia lavur vegn appreziada da la populaziun – e quai è fitg bel.
Per primcommunicantas e primcommunicants tutga era ina visita a l'orgla tar l'instrucziun da preparaziun. Uschia avra Anna-Maria Schlosser mintg'onn las portas lateralas da l'orgla. Quai che faszinescha uffants po era intgantar ils creschids. Per «vita e cretta» ha l'organista rutinada da Glion era avert las portas graschlas da l'orgla e manà nossa redactura en in mund dal tuttafatg surprendent.
En l'emissiun ans raquinta Anna-Maria Schlosser dentant era da l'impurtanza da la buna collavuraziun tranter il chor e tut ils commembers da la plaiv da Glion. Ma era davart la constanza e fidaivladad tar l'uffizi d'organista, sco era da sias preferientschas musicalas.
Jau hai gugent differents stils da musica. Ma mes cor batta per la musica sacrala.
Ils emprims 24 onns da sia carriera sco organista ha Anna-Maria Schlosser anc suna sin l'orgla veglia. Quella era vegnida construida 1954 a chaschun d'ina gronda transfurmaziun da la baselgia parochiala da Glion en stil neogotic. L'orgla veglia aveva servì enfin Pasca dal 1999. Passa dus onns han parochians e parochianas da Glion spetgà sin l’orgla nova. Ils nov da december 2001 aveva Anna-Maria Schlosser finalmain pudì inaugurar la nova orgla. Anc oz è ella intgantada da la cumplexadad, dal tun e la tecnica da ses instrument dal cor.
Impressiuns
-
Bild 1 von 4. Anna-Maria Schlosser all'orgla en baselgia parochiala a Glion. «Malgrad la rutina suenter passa 48 onns, am prepar jau adina per tut las funcziuns. Senza preparaziun na ma sent jau betg bain». Bildquelle: RTR.
-
Bild 2 von 4. Prest mez tschientaner all'orgla. «Grazia a la buna collavuraziun cun il plevon Alfred Cavelti e cun tut il gremi da la plaiv sun jau anc adina organista e questa lavur am cuntenta ferm.». Bildquelle: RTR.
-
Bild 3 von 4. In construct cumplitgà e fitg complex. Ina parait en l'intern da l'orgla. Bildquelle: RTR.
-
Bild 4 von 4. Ina pintga part da las fifas en l'intern da l'orgla. En l'intern da l'orgla sa preschenta in infinitad da stgaffettas, fifas e fols. Bildquelle: RTR.