Pli che 170 persunas da Trun e dal conturn collavuran per mussar il teater en il liber, e quai amez il vitg. La tribuna stat sut la baselgia sin il prà «Paliu da sogn Martin». Là è la scenaria creschida ils davos dis cun installar tut la tecnica, ed era la zona per il public è pronta per la premiera da venderdi che vegn. Uss hai dentant anc num da dar la davosa glimada, sut la reschia da René Schnoz. La survista gronda sto avair la scheffa da la producziun, Esther Berther.
L'istorgia che vegn mussada a Trun maina en l'ustaria d'in vitg, nua ch'ils vischins e las vischinas han ina massa da discutar. Ina rolla impurtanta gioga er ina nozza. Tge che quella nozza ha da far cun la vischnanca ch'è vegnida en las stretgas e che tema il dictat dal chantun – è da vesair e d'udir sin tribuna. E quant malizius che la glieud dal vitg reagescha sin questa situaziun hanada. Mess sin palpiri e sviluppà cun ils teatrists e las teatristas quest toc ha Michel Decurtins. Dasper ils pleds gioga era la musica da e cun Mario Pacchioli ina rolla impurtanta – e betg main prominent il maletg da la tribuna sviluppada da Patrick Rothmund, tranter auter cun chasas che sautan.
Questa cumedia seriusa, sco ella vegn numnada sin il frontispizi dal program, preschenta la gruppa da Trun e conturn en tut nov giadas, tranter mez e fin d'avust.
