Aventura cun effect da fascinaziun
«Plaunet sa cristallisescha l’ovra tar in project unic e grond. Nus ans legrain», di Laura Schmed da Trun. L'onn passà è ella sa preschentada al casting or da marveglias ed ha survegnì la rolla da protagonista. Gian-Andrea Beer aveva udì nagut dals castings, ma cura ch’il reschissur René Schnoz ha proponì ad el la rolla principala dals umens, ha el duvrà insaquants dis per digerir l'offerta.
Mes amis han reservà la ritscha davant, quai pudess chaschunar in pau tensiun tar mai.
Laura Schmed (23) è studenta a «L’école d’Hotelerie Suisse» a Lausanne e terminescha l'onn proxim ses diplom da bachelor. Gian-Andrea Beer (33) è turnà suenter il studi d’architectura da Turitg a Rabius per prender suenter tut ils emprendissadis en il sectur da construcziun auta per surpigliar l’interpraisa da construcziun da la famiglia Beer SA. Dapi la fin schaner s'engaschan e lavuran ils dus protagonists cun in'entira squadra da teatristas e teatrists da Trun vi da l’ovra «sut igl ischi- il teater» ch'ha premiera ils 16 d’avust a Trun.
Laura Schmed gioga la rolla da Lisa Tomaschett, ina giuvna sveglia, intelligenta e pronta da cumbatter per la giustia.
Gian-Andrea Beer gioga il giuven president communal da Trun Gian Luca Berther. In um da bun cor, ma na betg propi abels d'ademplir cumplainamain ses pensum. Ma perquai ha el sia amia Lisa ch'è pronta da tegnair nà il tgau.
Lisa Tomaschett ed jau essan sumigliantas. Mintgatant èsi difficil da sortir da la rolla.
Tgi èn questas duas giuvnas persunas che na s'enconuschevan betg avant las emprovas da teater? Con simpel u con difficil èsi stà da s'identifitgar cun lur rollas da teater? Tge fa plaschair ad els e tge caschuna ad els battacor? En il profil da sonda, ils 10 d’avust, raquintan Laura Schmed e Gian-Andrea Beer da las sfidas sin tribuna, ma era da lur vita privata, lur siemis dal futur e co igl è gartegià da metter tut sut in chapè. Emprovas da teater, studi e vita professiunala.