Ils davos onns èn vegnids creads adina dapli bogns cun aua da glatsch. Per part èn quels creads a moda fitg simpla, vul dir ina fora en in lai. Auters lieus han in'entira infrastructura cun gardarobas e sauna. Il far bogn en l'aua da glatsch è pia er arrivà en il segment da luxus.
Pertge il sigl en l'aua fradaglia – ina fascinaziun grev da declarar
Tge fascinescha la glieud da bandunar la stiva chauda e purtar l'agen corp per in curt mument en l'aua fradaglia ed uschia als cunfins supportabels? Questa dumonda avain era fatg a differentas persunas durant las filmadas. I fetschia bain ed i saja insatge meditativ u relaxond. Ma propi descriver il sentiment para d'esser difficil per tuttas e tuts. Uschia ha noss reporter Gian-Marco Maissen stuì prender sias chautschas da bogn, rimnar bler curaschi e far sez il pass en l'aua da glatsch.
Ina maschaida da sentiments paradox
Badà ha Gian-Marco Maissen cunzunt ina mixtura extrema d'emoziuns e sentiments en quest curt mument d'entrar en l'aua da glatsch. Suenter curt temp cumpara ina tema da betg pli survegnir flad ed esser en grond privel. A la fin dal bogn senta Gian-Marco Maissen lura ina gronda purziun adrenalin ed euforia, sco sch'el avess gist fatg in sigl da bungee – e tut quai en stgars duas minutas. Sumegliant vai era ad auters noviz da far bogn en l'aua da glatsch.
Far il bogn inclusiv sauna per 250 francs
Ils giasts en il bogn da glatsch a Plaun da Lej – a l'ur dal Lej da Segl – èn fitg differents. Indigens, ma era giasts dals hotels nobels, ristgan qua il pass en l'aua fraida. In bogn simpel custa 5 francs per persuna. Cun quests raps finanzieschan ils hoteliers la lavur ch'els han mintga di per mantegnair ils pools e deliberar las rusnas dal glatsch.
Tgi che vul in'offerta pli luxuriusa po prender a fit il pool inclusiv d'ina sauna per duas uras e mez – quai era gist per in'entira gruppa. Quest'offerta custa lura 250 francs. La sauna è savens occupada ed era uschiglio visitan da bell'aura 30 fin 40 persunas a di lur bogn fraid.
Cun rutina daventa il bogn ina meditaziun
Las emprimas giadas en l'aua fraida èn per blers e bleras in schoc e stress. Ma cun il temp pon ins emprender d'ir enturn cun il fraid. Il chau empren che quest fraid n'è betg in privel. Uschia dat en egl, che persunas che fan regularmain bogn en l'aua da glatsch daventan fitg calmas – gea schizunt meditativas. Era Matilda Monn da Sedrun stat en il bogn da glatsch uschè patgific, sco auters en la bognera chauda a chasa. Ella saja era gia stada 15 minutas en l'aua fraida, ma quai na saja lura segir betg pli bun, raquinta Matilda Monn.
Il fraid resta dentant er adina in privel
Dasper tut la fascinaziun e l'euforia per il fraid restan temperaturas bassas per l'uman adina er in privel. En Grischun n'èn fin ussa per cletg nagins accidents grevs enconuschents en connex cun il far bogn en aua da glatsch. Ma tuttina po noss corp spert ina giada vegnir a ses cunfins, sch'i va per il fraid. Il guid da muntognas, Peter Gujan, n'è betg in fan dal fraid. Ma per el tutga quai tar sia lavur ed era tar ils hobis sco rampignar sin glatsch, turas da skis u passlung. Gea, era il cornet da glatsch na dessi betg senz'il fraid.
Il fraid n'è pia betg adina flot, ma tut senza giess era betg. Peter Gujan ha dentant sez gia stuì far experientschas al limit cun il fraid – gea schizunt stuì render pervi dal fraid. Gist da curt saja Peter Gujan cun ina giasta sin ina tura da skis vegnì en ina situaziun privlusa, ch'avess cun in zic discletg era pudì daventar fatala. Malgrà tut ils aspects fascinants – il fraid saja adina er in privel
Cun las chautschas da bogn tras l'atgna ustaria
Per ils ins è far bogn en l'aua fraida in ritual u ina meditaziun ch'els fan per sasez. Per auters è il bogn fraid in'acziun da curaschi u la via tar ina fotografia speziala. Dretg è sbaglià na datti crai betg en quest connex. La fin finala pon ins forsa era cumbinar ils dus munds u silmain purtar pli datiers in a l'auter.
Ils hoteliers a Plaun da Lej – Antonio e Nico Walther – emprovan en mintga cas d'animar lur giasts d'era far part a lur ritual quotidian. Suenter la lavur (u or da vista dal giast suenter tschaina) fan els numnadamain in bogn relaxond en l'aua da glatsch. Perquai chaminan els – sch'adina pussibel – cun las chautschas da bogn tras l'ustaria. Da temp a temp accumpognia propi insatgi ils dus hoteliers spontan en l'aua. Ed uschiglio vegnian ils giasts per il pli simplamain a guardar sche Antonio e Nico Walther gughegian propi il pass en l'aua fraida u sche tut è be show.
«Glatsch» or da l'archiv:
Ils glatschers èn sin murir – quai n’è betg pli ina prognosa, mabain la realitad actuala. Las redacturas, Isabelle Jaeger e Bertilla Giossi, han vulì savair tge che quai signifitga per il Grischun ed han perquai visità quatter dals 444 glatschers grischuns: