Rutina mensila
Mintga emprima mesemna dal mais va la gruppa da Martin Bosch a nudar en l'aua da glatsch en il Lai da Cresta. Martin Bosch è l'iniziant da la tradiziun mensila. A Turitg ha el cumenzà a far bogn en aua da glatsch, cun far midada en il Grischun, ha el prendì cun sai il hobi che tutga tar la rutina fixa da l'um che lavura sin la staziun intensiva da l'Ospital chantunal a Cuira.
Il nudar en l'aua da glatsch ma dat ina calma, dentant er ina segirezza da mamez en il mintgadi.
Novas experientschas
Simona Bundi da Glion ristga per l'emprima giada dad ir en l'aua da glatsch. Ella sa legria, manegia la rumantscha. Far bogn en aua da glatsch saja in bun exercizi per bandunar la zona da confort e per rinforzar la conscienza da sasez.
La pli gronda sfida per mai era la respiraziun – da betg iperventilar.
Vista medicinala
Walter Kistler è schefmedi da sport a Tavau. El sa fatschenta gia daditg cun il tema da far bogn en l'aua da glatsch. Cunquai che far bogn en aua da glatsch è in trend da sanadad relativamain nov, na saja la perscrutaziun che sa fatschenta cun la tematica betg anc fitg lunsch, declera il medi. La gronda part dals avantatgs fisics sco er psichics, ch'ils nudaders e las nudadras paran da sentir, na possian ins perquai betg anc cumprovar dal tuttafatg. I dat dentant excepziuns:
Jau sun persvas che far bogn en aua da glatsch po gidar tar malsognas psichicas sco per exempel depressiuns.
Coach da nudar en l'aua da glatsch
Markus Blum da Tavau è nudader d'aua da glatsch passiunà – dapi tschintg onns persequitescha el il hobi glazial. Mintga gievgia saira durant l'enviern porscha el in curs da far bogn en l'aua da glatsch. Per principiants e principiantas ha el insaquants tips e trics per far pli simpel l'entschatta:
Per tranter auter far progress en la scienza vulan Markus Blum e Walter Kistler sviluppar ina structura da far bogn en aua da glatsch a Tavau. Planisà èsi che Markus Blum porscha divers curs nua ch'ils participants e las participantas pon emprender da far bogn en aua da glatsch – quai pass per pass e cun agid professiunal. Walter Kistler vuless surpigliar la part medicinala – la perscrutaziun.
