«Jau hai slargia mes cor per la vita»
«Era Columbus na saveva betg nua ch'el arrivia cun sia bartga. Sumegliant èsi stà cun mia idea da la «Pop-corn Opera», di Bibi Vaplan, artista e musicista engiadinaisa.
Dentant è l’univers da pop-corn creschì ad ina calamita multimediala che carmala il public en in mund creativ plain musica e «cha-cha-cha». L'Olma da quest univers multifar e fantastic èn ils dus bovs Roccobello e Leon che han cumplenì quatter onns e che paisan 600 kilos.
Sche tut fuss pussibel – tge vuless jau crear?
Dal mument che Bibi Vaplan è sa tschentada la dumonda saja tut stà cler. L’emprim «plop» dal univers da pop-corn hai dà il mars 2020. En quest profil ans raquinta Bibi Vaplan da las sfidas sco musicista da professiun e managera da l'univers da pop-corn, nua che la turnea maina sia squadra l’onn 2025, ma era dal plaschair che Bibi Vaplan ha gì la fin da matg cura che ella ha retschavì il premi da renconuschientscha dal Grischun. «Quai premi mussa che jau fatsch tut endretg», di l’artista oriunda da Scuol. Era sche na betg tuts han chapì che la lavur cun ses bovs porta plaschair en sia vita.
Sche jau avess trenà cun dus chavals, n'avessi betg dà reacziuns.
Bianca Mayer ha frequentà il Conservatori da musica a Turitg e studegià clavazin. L'amur per il clavazin ha manà la giuvna dunna tar la «Ballada en g-mol» da Chopin. «Quella ballada ha avert per mai in nov mund, il vast mund da la musica». In problem al maun dretg ha mussà a la giuvna Bianca Mayer che musica po avair pliras furmas e fassettas. Uschia ha è ella scrit musica per teater, ella è stada battarista tar la furmaziun da dunnas «The Clowns» e pli tard ha ella mess en pé il project «Alba da la Clozza». Cun quest project haja ella chattà anavos tar sias ragischs en Engiadina e tar il rumantsch. Tschintg albums ha Bibi Vaplan edì avant che sa metter a la tschertga da novas vias sco artista e creadra da la «Pop-Corn Opera».
En il profil dals 15 da zercladur tradescha Bibi Vaplan dapli da siemis, da plaschair e tge che tegn davent ella da las «foras violettas» en la vita.
Bibi Vaplan
-
Bild 1 von 7. Bibi Vaplan en il nov video da la nova chanzun «Culurio». Bibi Vaplan publichescha tut sias chanzuns cun video. Bildquelle: Bibi Vaplan .
-
Bild 2 von 7. Roccobelle e Leon sin pastira a Lumbrein. Na adina è la vita dals dus bovs usche paschaivla. Blers dis hai num trenar cun Bibi. Bildquelle: Bibi Vaplan.
-
Bild 3 von 7. Bibi Vaplan cun ses chaun Maruk. RTR ha pudì visitar l'artista e musicista a Lumbrein en ses atelier. Bildquelle: RTR.
-
Bild 4 von 7. Guradar il mund da sutsura porta novas perspectivas. Bibi Vaplan en l'uniforma da sia la «Pop-corn Opera». Bildquelle: Gäggeligääl GmbH.
-
Bild 5 von 7. Sco pop-corn en la chazzetta neschan ideas tar Bibi Vaplan. Ina artista e musicista che è adina pronta per novs «plops» da la vita. Bildquelle: IDAfotografias.
-
Bild 6 von 7. A Bibi Vaplan na mancan betg las ideas. Inscenaziun en il rom dal univers colurà e fantastic da la «Pop-corn Opera». Bildquelle: Gäggeligääl GmbH.
-
Bild 7 von 7. Artista da l'inscenaziun. Fotrografia ed estetica fan part da sia lavur artistica. Bildquelle: IDAfotografias.