Il project da l’univers da popcorn è tant fascinant sco abstract. Suenter pliras publicaziuns d’albums e turneas da concert ha l’autura, ch’è creschida si en l’Engiadina Bassa e viva uss a Lumbrein, giavischà in esser creativ pli ademplì.
Cumenzà ha quest project cun l'adopziun da dus bovs, Rocobello e Leon, che pudevan uschia evitar la banca da maz e che servan uss sco protecturs da l'univers da popcorn. Dapi lura sa sviluppescha il project cuntinuadamain vinavant. Sper pliras publicaziuns da chanzuns datti ina mini docu-seria davart ils dus bovs, poesias, podcasts, in gieu per il telefonin e differentas illustraziuns.
Dapi la fin d'october datti l'opera popcorn ussa era d'admirar sco grond spectacul live. Il toc multimedial cumbinescha ina diversitad da stils musicals cun dramaturgia e projecziuns.
Sper Bianca Mayer al chant, basssynthesizer e saxofon èn era la percussiunista engiadinaisa Valeria Zangger, Chianu Mautz, Jonas Inglin, Melia Inglin e Mirjam Scherrer sin tribuna. Tut las musicistas sa participeschan al chant e sunan durant la represchentaziun differents instruments.
Per la reschia è Magadlena Nadolska responsabla, per la dramaturgia Manuela Steiner.
Suenter l’emprima represchentaziun en il Theater Casino a Zug festivescha la «Popcorn-Opera» sia premiera grischuna mardi, ils 7 da november. Suenter datti fin ils 9 da november anc trais ulteriuras represchentaziuns en la Postremise.
