Il film – part II - IL TÖDI: dus teams, duas ascensiuns, ina finamira

200 onns suenter la primascensiun ha RTR accumpagnà in'alpinista e trais alpinists sin il Tödi. In team è partì da la vart grischuna a Trun e tschel team davent dal chantun da Glaruna a Hinter Sand. Lur finamira: s'entupar sin il Piz Russein – il pli aut punct dal Tödi sin 3'612 meters sur mar – nua ch'els sa vesan per l'emprima giada. L'ascensiun è vegnida documentada cun cameras e vegn raquintada en ils Cuntrasts l'emprim da settember.

Il team grischun

Aluis Tambornino (1962), Trun

L’emprima gia è Aluis stà sin il Tödi cun 19 onns, dapi lura va el 2 fin 3 giadas ad onn siador. Aluis Tambornino è scolast al Center da furmaziun Surselva. Là instruescha el rumantsch, tudestg ed istorgia.

Flurin Maissen (1957), Trun

Flurin è en tut stà 50 fin 60 giadas sin il Tödi, l'emprima giada gia cun 17 onns. Bleras da quellas ascensiuns ha el fatg ensemen cun Aluis. Flurin Maissen è ensemen cun ses frar Curdin mainagestiun da la Scrinaria Maissen a Trun.

Il team glarunais

Alice Konzelmann (1952), Glaruna

Avant 15 onns è Alice Konzelmann stada l’emprima gia sin il Tödi, ella è immediat s’inamurada en il piz. Dapi lura va ella regularmain duas giadas ad onn sin «ses» culm. Enturn culiez ha ella ina chadaina cun il profil dal Tödi ed vi dal maun in ané cun il Tödi. Alice Konzelmann è dermatologa, ella pratitgescha anc adina.

Ueli Frei, Glaruna

Ueli è guid da muntogna e maina dapi onns regularmain giasts sin il Tödi. Sper sia lavur sco guid en ils culms fa el era lavurs en suga sin plazzals industrials.

Barat da regals

En lur satgados ha mintga team in regal per ils collegas da tschella vart dal Tödi. Il team glarunais ha per ils Grischuns in ponn tipic glarunais plain delicatessas da la Glaruna. Il regal dals Grischuns è ina ischetta charnpiertg en memoria als dus erox da l’emprima ascensiun, ch’han avant 200 onns laschà enavos la cutga da lur charnpiertg per marcar lur primascensiun.

Il film – part I: 200 onns primascensiun dal Tödi

Ils dus Sursilvans partan la damaun marvegl davent da la tegia d’alp Russein sura. Pader Placi a Spescha – il pionier da l’alpinissem – mussa ad els ina ruta pussaivla per ir sin il Tödi. Per il pader da 72 onns è l’aventura sin ses culm tant bramà memia fadiusa. Cun ses perspectiv lung persequitescha el il success da ses dus cumpogns en la val Russein, davent da la spunda visavi. Il spitg cuntanschan ils dus piuniers las 11.00.

Il dus pioniers grischuns

En sias scrittiras numna il pader mo ils nums da ses dus cumpogns ch’el trametta sin il Tödi. Dapli n'era fin uss betg enconuschent. Per il film davart la primascensiun dal Tödi ha l'istoricher Gieri Venzin retschertgà e chattà ora il suandant:

Augustin Biscuolm , oriund da Trun, aveva 38 onns cura ch’el è i sin il Tödi. Morts è el cun 93 onns, sto esser ch’el aveva ina buna constituziun. El era il statalter da la claustra, contrahava pia cun la glieud ch'aveva da far fatschentas cun la claustra.

Placi Antoni Curschellas è naschì a Selva, era pia in Tuatschin. El aveva 48 onns l’onn da la primascensiun. A Trun è el sa chasà suenter avair maridà ina Beer da Trun. Il pader ha el dentant emprendì d’enconuscher a Selva. Pader Placi a Spescha era 1809 chaplon enta Selva. Ils chaplons avevan da lez temp era funs ed animals ed ils Curschellas faschevan il puresser dal pader.

Pader Placi a Spescha – in pionier tras e tras

Pader Placi a Spescha (1752-1833) entra en la claustra benedictina da Mustér cun 22 onns. Cun 30 onns daventa el pader. Il spiert claustral da lezzas uras era in spiert baroc, catolic-conservativ. Spescha era percunter in aderent da las ideas da l'illuminissem e cun quai lunsch ordavant a ses contemporans. La claustra simpatisescha cun ils Austriacs, Spescha venerescha Napoleon e simpatisescha cun las ideas da la revoluziun franzosa.

En sias scrittiras descriva el il mund alpin. El rimna e perscrutescha plantas e minerals, elavurescha numerusas chartas, el s’engascha per ovras socialas ed industrialas, sviluppescha l’idea d’ina scrittira rumantscha communabla e d’ina fusiun dals idioms (emprim uniunist rumantsch). Cun auter pleds: el è mineralog, econom, filolog, istoricher, cartograf, geograf, teolog, filosof, tut enina.

Pader Placi a Spescha – l’emprim alpinist

Ils emprims che gievan per la pizza eran Englais u scienziads e burgais da las citads. Pader Placi a Spescha è stà in'excepziun. El è renconuschì lunsch sur ils cunfins sco excellent alpinist. El vegn perfin numnà il pionier dal alpinissem.

Sco alpinist reusseschan a Placi a Speschas dapli ch’in tozzel primascensiuns. Per exempel: Scopi 1782, Stocgrond 1782, Piz Cristallina, 1782, Piz Uffiern 1785, Piz Badus 1785, Adula 1789, Piz Ault 1792, Piz Tgietschen 1793, Piz Urlaun 1799, Terri 1801 u 1802, Piz Avat 1803, Piz Giuf 1806, Güferhorn 1806.

Ses davos dis passenta il «curios pader» en la Cuort Ligia Grischa a Trun, Spescha mora ils 14 d’avust 1833, ses davos pleds sajan stads: «Uss dat la baracca ensemen».

Ils emprims Glarunais sin il Tödi

Ils onns che pader Placi a Spescha tschertgava da conquistar il Tödi aveva el en Glaruna in concurrent, Johannes Jacob Hegetschweiler da Stäfa. El era medi, botanicher, politicher ed alpinist. Era el ha empruvà pliras giadas dad arrivar enfin sin il spitg dal massiv dal Tödi, ma senza success. Pir 13 onns suenter l’emprima ascensiun grischuna èsi gartegià a trais purs dal Linthal dad arrivar enfin sum.

Las emprimas dunnas sin il Tödi

L’englaisa Fanny Lucy Maitland è stada l’emprima dunna sin il Tödi. En il cudesch da la chamona Grünhorn ha ella nudà ses num ed il datum: «July 12 – 13th 1869».

L’emprima dunna glarunaisa sin il Tödi è stada Nelly Zwicky, l'onn 1902. Ella era alpinista passiunada, poetessa e pictura artista talentada. In pèr onns suenter sia emprima ascensiun è ella vegnida ina segunda gia sin il massiv.

Davos las culissas Val Russein

Davos las culissas sin il Tödi

En memoria a la primascensiun – dus teams sin il Tödi

200 onns suenter la primascensiun ha RTR accumpagnà ina alpinista e trais alpinists sin il Tödi. In team è partì da la vart grischuna a Trun e tschel team davent dal chantun da Glaruna a Hinter Sand. La finamira era da s'entupar sin il Piz Russein, nua ch'els èn sa vesids per l'emprima giada. L'ascensiun è vegnida documentada cun cameras e l'avanzament è vegnì persequità via tracking da GPS. Lur aventura vegn lura raquintada en la segunda part dal film da Cuntrasts il prim da settember.

Tödi – Piz Russein

Avrir la box Serrar la box

Il Tödi ha trais spitgs, vers nord il Sandgipfel 3'390 m s. m., vers ost il Glarner Tödi 3'570 m s. m. ed il pli aut è il Piz Russein 3'612 m s. m.

Il Tödi è il pli aut culm da Glaruna e da la Surselva, nua ch’el vegn numnà il Russein.

Pader Placi a Spescha scriva adina dal Piz Russein. Sin sias cartas dissegna el in culm cun dus pizs.

Team Grischun

Aluis Tambornino (1961), Trun: L’emprima giada è Aluis stà sin il Tödi cun 19 onns, dapi lura va el duas fin trais giadas ad onn siador. Aluis Tambornino è scolast al Center da furmaziun Surselva (scola professiunala a Glion), el instruescha rumantsch, tudestg ed istorgia.

Flurin Maissen (1957), Trun: Flurin è stà cun 17 onns l’emprima giada sin il Tödi, dapi lura 50-60 giadas e da quellas bleras ensemen cun Aluis. Ensemen cun ses frar Curdin è Flurin Maissen mainagestiun da la Scrinaria Tarcisi Maissen a Trun.

Intginas impressiuns

Team Glaruna

Alice Konzelmann (1951), Glarus : Avant 15 onns è Alice Konzelmann stada l’emprima giada sin il Tödi, ella è immediat s’inamurada en il piz. Dapi lura va ella regularmain duas giadas ad onn sin «ses culm». Enturn culiez ha ella ina chadaina cun il profil dal Tödi e vi dal maun in anè cun il Tödi. Alice Konzelmann è dermatologa, ella pratitgescha anc adina.

Ueli Frei, Glarus: Ueli è guid da muntogna e maina dapi onns regularmain giasts sin il Tödi. Sper sia lavur sco guid en ils culms fa el era lavurs en suga sin plazzals industrials.

Impressiuns da la vart glarunaisa

Sco alpinist reusseschan a Placi a Speschas dapli ch’in tozzel primascensiuns. Per exempel: Scopi 1782, Stocgrond 1782, Piz Cristallina, 1782, Piz Uffiern 1785, Piz Badus 1785, Adula 1789, Piz Ault 1792, Piz Tgietschen 1793, Piz Urlaun 1799, Terri 1801 u 1802, Piz Avat 1803, Piz Giuf 1806, Güferhorn 1806

Ses davos dis passenta il «curios pader» en la Cuort Ligia Grischa a Trun, Spescha mora ils 14 d’avust 1833, ses davos pleds sajan stads: «Uss dat la baracca ensemen».

Or da l'archiv: Pader Placi a Spescha

Or da l'archiv: Il Tödi stat a l'entschatta dal Club alpin svizzer

Sin il Tödi duess Rudolf Theodor Simler da Wollishofen/Turitg avair gì l'idea da fundar il Club alpin svizzer (CAS). Ils 19 d'avrigl 1863 vegn quel fundà ad Olten e Simler daventa ses emprim president. Il medem onn vegn bajegià anc la chamona Grünhorn – la «mamma» da tut las 152 chamonas dal CAS. En ina documentaziun filmica quinta il cineast Gieri Venzin or da la gronda istorgia da la conquista da las Alps.