Prest 100 onns discurran politichers e politicras adina puspè sur dad in tunnel atras il massiv dal Tödi. Gia il 1925 è quell'idea vegnida skizzada ina giada – da lez temp anc sco colliaziun tranter la Val da la Linth e Biasca. Ils onns 60 è quest project alura vegnì pli concret: sco lingia da tren Tödi/Greina. Schabegià n'è dapi lura dentant pauc fin nagut.
Jau chat ch'igl è da tegnair chaud quest paunin per il futur.
Motiv avunda per Maurus Tomaschett – deputà da l'Allianza dal Center – da dumandar la regenza co i stat cun il tunnel tras il Tödi. Bain savend ch'in project è pauc realistic per il mument, pertge in'emprim chanaster aveva el gia survegnì avant bunamain 10 onns.
Bain in'idea, però nagina prioritad
La regenza aveva gia il 2013 ina giada prendì posiziun areguard il tunnel lingia Tödi. Era da lez temp era quell'idea vegnida valitada sco pauc realistica – tranter auter perquai che la Confederaziun aveva valità l'idea sco pauc empermettenta. Dapi lura è pauc sa mida. Bain ha il chantun tegnì, en barat cun il chantun Glaruna, pendent l'idea dal project; dapli n'è però betg sa resultà.
In tal project n'è per il mument betg fitg realistic – er pervia dals criteris da la Confederaziun.
Perquai n'è l'idea dal project «tunnel dal Tödi» betg vegnida messa sin la glista d'inoltraziuns da planisaziun da la regiun. Lezza po inoltrar mintga 10 onns novs concepts da purschidas sur l'atgna zona da planisaziun ora. E prioritad han là auters projects d'infrastructura da viafier; da quels ch'hajan in pli grond niz per l'economia publica dal chantun Grischun, e quai tant per la populaziun, per il turissem sco er per l'economia. Quests projects stoppian en consequenza vegnir tractads cun pli auta prioritad ch'il project «tunnel dal Tödi».