La concurrenza da divertiment è per uschè da dir il sulet ch'è restà da la Festa districtuala da musica da la Surselva l'onn 2020. La societad da musica Vignogn ha vulì organisar questa festa er en connex cun ses agen giubileum da 100 onns. La pandemia da corona ha però fatg in grass stritg tras il quint. Suenter duas giadas spustar ha il virus la finala sfurzà ils responsabels da stritgar la festa districtuala dal tut.
Senza festa n'ha la musica da Vignogn dentant betg vulì festivar ses centenari. Il settember 2021, a chaschun da la Pardanonza, è la musica sa preschentada al vitg en uniformas novas e cun instruments novs ch'èn vegnids cumprads per il giubileum.
Il GP Vignogn
La gronda festa d'anniversari ha la Societad da musica Vignogn prendì suenter a Vella cun la concurrenza dal GP Vignogn: il Grond Premi Vignogn. Igl è ina concurrenza da musica da divertiment. La Musica Greina Vrin, la Musikgesellschaft Vals, la Musica da Glion, las societads da musica Lumbrein, Suraua, Trun e l'Uniun da musica Sagogn han cumbattì per il titel.
Igl è ina concurrenza da musica da divertiment senza categorias da fermezza, tuttas societads da musica sunan en la medema categoria. Las producziuns da las singulas musicas na dastgan betg durar pli ditg che 15 minutas. Il program da las musicas ha stuì cuntegnair almain in marsch.
Las producziuns en maletg
I ha dà ils suandants titels:
- il meglier il marsch dal di (tenor ina giuria professiunala)
- il meglier il marsch dal di (tenor il public)
- victur dal di per la meglra prestaziun cumplessiva (30% valitaziun tenor la giuria professiunala e 70% tenor la valitaziun dal public)
Ils victurs
La musica che ha fatg la meglra impressiun da l'entira producziun è stada la Societad da musica da Trun ed ha uschia gudagnà il titel. Sin plazza dus èn ex aequo l'Uniun da musica Sagogn e la Societad da musica Suraua.
Ils titels per avair sunà il meglier marsch van a la Musica da Glion (tenor giudicament dal public) ed a l'Uniun da musica Sagogn (tenor il giudicat da la giuria professiunala, Rafael Camartin e Fabian Bloch).
Per las societads participantas sco era per l'organisaziun è quai stà ina nova furma da concurrenza cunquai ch'i è stà giavischà che las musicas sa preschentan cun elements da «show», pia cun coreografias u effects. Il president dal comité d'organisaziun, Curdin Foppa sa mussa satisfatg dal GP Vignogn:
Ord la situaziun in zic deprimenta cun stuair spustar e la finala dir giu la festa districtuala, hai dà ina nova moda creativa da far festa. Quai è eventualmain era in format per festas da giubileums u schizunt per proximas festas da musica. Davart il program da divertiment dal GP è Curdin Foppa dal maini ch'i saja stà in'entschatta:
Nossas musicas n'èn betg uschè disadas da far show. Ma ins ha vis blera creativitad e quai è ina buna entschatta e dat nov schlantsch.
Era Remo Derungs (dirigent da la Societad da musica Vignogn e responsabel per il GP) è satisfatg da las prestaziuns a chaschun da la concurrenza. Ins haja vesì interessantas producziuns e mintga societad haja empruvà d'integrar elements da show. El saja dal maini che las musicas partizipantas hajan fatg quai grondius.
Instrumentala ed Artg musical
RTR ha registrà las producziuns da las societads da musica participantas cun video ed audio.
Ils videos da las producziuns datti er da guardar sin PlayRTR, HbbTV e sin youtube.
