Sch'ins passa sur il Pass dal Güglia en Engiadina, maina la via dal pass tras il pitschen vitg da Mulegns. Mo pli radund 13 persunas abiteschan qua. L'instituziun culturala Origen ha cumprà en l'anteriur vitg dals pastiziers pliras immobiglias e vul far or dal vitg in nov lieu da cultura.
L'um davostiers: Giovanni Netzer, iniziant ed intendant dal festival «Origen». El è teolog e teatrist a medem temp. Ed el è enconuschent per sias ideas extraordinarias – da la tur cotschna sin il Güglia fin a ses pli nov coup: ina tur stampada en 3D a Mulegns.
En discurs cun la moderatura da RSO, Katharina Balzer, e cun il moderatur da RTR, Andri Franziscus, s’exprima Giovanni Netzer tranter auter er davart resistenzas da persunas indigenas cunter sias ideas e visiuns sco quai ch'igl è il cas a Mulegns:
La profunditad da tristezza en in tal lieu n'avess jau betg spetgà.
Giovanni Netzer na vesa la resistenza cunter il svilup dentant betg mo sco fenomen dals da Mulegns. I saja plitost in fenomen da circa 50% da las vischnancas grischunas. «La glieud na crai betg pli en in meglier futur per l'agen vitg», uschia Netzer. Quai saja damai er ina da las dumondas centralas che fatschentan el: nua arriva il chantun Grischun, sch'el perda la veglia da ses agen svilup?
Musica da l'ensemble vocal Origen
10 dumondas a Giovanni Netzer
- Ballet u chant? Ballet.
- Kino u Netflix? Kino.
- Stimular u trategnair ? Stimular.
- La dumengia: baselgia u durmir ora? Baselgia.
- Drama u cumedia? Drama.
- Uffizi da cultura Grischun u Uffizi federal da cultura? Grischun.
- Sustegn dal stadi u mecen? Mecen.
- Improvisaziun u reschia stricta? Improvisaziun.
- Minca u Cuira? Minca.
- Success tar il public u libertad artistica? Libertad artistica.
«50:50» – il videocast communabel da Somedia e RTR
Somedia e Radiotelevisiun Svizra Rumantscha RTR porschan cun il format da talk «50:50» in nov product communabel. Il videocast vul promover mintga mais discurs approfundads cun exponentas ed exponents da l'economia, da la politica e da la societad.
Pertge il num «50:50»?
- Equiliber e diversitad: il num dal videocast accentuescha las stentas da preschentar ina selecziun da giasts equilibrada e diversa per represchentar ina vasta paletta da chaus e persunalitads.
- Simplicitad e clerezza: In num simpel e chapibel sco «50:50» associescha directamain l'idea fundamentala dal podcast, senza stuair declerar bler dapli.
- Simbol da fairness: La relaziun da 50:50 vegn duvrada savens sco simbol per fairness ed egualitad – quai che correspunda bain er a las finamiras dal podcast.