Sco quai che l’intendant da Origen Giovanni Netzer ha ditg, vegnia il cusseglier federal Alain Berset ad inaugurar il teater sin il Güglia ils 31 da fanadur. Il teater vegn duvrà ils proxims quatter onns, suenter vegn l'implant puspè demnontà.
La tur sin il Güglia custa radund 2,5 milliuns francs. Ils custs surpiglian tant il maun public sco era fundaziuns culturalas e sponsurs. Anc mancan radund 800'000 francs, per finir l'entira construcziun sco per exempel il tetg. Giovanni Netzer è dentant da buna speranza, da pudair finanziar era la segund'etappa dal project sco quai ch'el ha trandì ad RTR.
Sin la tur sin il Pass dal Güglia vegn concertà durant l'entir onn. Ina gronda sfida saja l'aura, che pudess mintgatant far in stritg tras il quint dal teater. Per vegnir tar il teater dal pass, datti transports specials cun l'auto da posta.
La tur è ina construcziun da laina cun in'autezza da 30 meters. Cun sias fanestras rodundas ragorda la tur a la tur da Babylon. Entamez da la construcziun sa chatta la tribuna, che po vegnir auzada automaticamain sin differentas auzadas. Dapli che 200 persunas pon visitar il teater il medem mument, els sesan en loggias a l'ur da la tribuna.
-
Bild 1 von 6Legenda: La tur cotschna sin il Güglia en ina visualisaziun dad Origen. mad -
Bild 2 von 6Legenda: Ils aspectaturs guardan da surengiu sin las ballerinas ed ils ballerins. mad
-
Bild 3 von 6Legenda: La tribuna è movibla e po s'auzar per einfin quatter auzadas. mad
-
Bild 4 von 6Legenda: L'inschignier Walter Bieler preschenta ils plans da la tur sin il Güglia. RTR, Federico Belotti
-
Bild 5 von 6Legenda: Ils trais Surmirans preschents a l'infurmaziun a Turitg: Leo Thomann, president Surses (sanester), Giovanni Netzer ed Enrico Uffer da la Uffer SA che vegn a construir la tur. RTR, Federico Belotti
-
Bild 6 von 6Legenda: L'intendant dad Origen Giovanni Netzer (terz da sanestra) ed ulteriurs involvids han preschentà a Turitg lur pli novs plans per il Pass dal Güglia. RTR, Federico Belotti