Di per di per di arriva il rument grischun en l’ardera da la Gevag a Trimmis. Passa 100'000 tonnas ad onn vegnan furnidas a la Gevag, a la Corporaziun da vischnancas per l’allontanament da rument en il Grischun.
Dismetter rument è in process cumplex
Fin che tut quai che nus Grischunas e Grischuns pensain da stuair bittar davent è dustà, ha il rument da passar in process cumplex. En l’ardera da la Gevag, l’implant marcant sin territori da Trimmis gist sper l’autostrada, procuran 45 persunas per l’elavuraziun da quest rument.
-
Bild 1 von 5Legenda: A la ballantscha – Nicole Scherrer paisa tut quai che va en l'ardera. RTR
-
Bild 2 von 5Legenda: L'um en la logistica – qua ha Christian Müller inscuntrà Brigitte Bardot, quasi. RTR
-
Bild 3 von 5Legenda: Be energia – mainaprojects Raimund Venzin tar la rait da chalur a distanza. RTR
-
Bild 4 von 5Legenda: I na resta betg be merda – directur François Boone mussa, quant metall che las restanzas dal rument brischà cuntegnan. RTR
-
Bild 5 von 5Legenda: La patruna da la grifla – mainacrana Katja Baumgartner dosta cun mintga griflada sis tonnas rument. RTR
Ellas èn a la ballantscha, en la halla per stgargiar a maun, en la logistica, a la crana, en la stanza da controlla, tar l’administraziun, tar las pignas e tar il mantegniment, per numnar be intginas staziuns.
Il rument na va betg be si e da chamin ora
L’energia che vegn libra cun arder tut quai che las Grischunas ed ils Grischuns na vulan betg pli vegn transfurmada. Il material primar da l’energia è la vapur ch’il fieu fa cun arder.
Las duas lingias da pignas han ina capacitad termica da 28 megawatt (equivalent circa a 38’000 ps) e 21,25 megawatt, quai che correspunda a var 28’900 ps.
Chalur sin distanza ed electricitad
La vapur chauda vegn elavurada: Sco chalur vegn ella spisgentada en ina rait da bischens da var 65 kilometers lunghezza, la rait da chalur a distanza. Cun quella na vegnan betg be stgaudadas chasas privatas en la Val dal Rain, mabain per exempel er industria, sco la fabrica da palpiri u la Emmi a Landquart u a Cuira er ils ospitals, la curt episcopala e la scola chantunala.
Cun in’autra part da l’energia vegn fatga forza electrica – tut en tut 3,5% da l’electricitad grischuna vegn producida cun arder rument.
La fin dal rument
Quai che resta suenter la pigna gronda, suenter ch’il rument è ars, l’energia è vegnida producida, il fim e l’aua da sfradentar èn nettegiads, èn las restanzas da ruments brischads u per tudestg la Schlacke. Il volumen dal rument è uss reducì da 93% sin 7%, el è igienisà (vul dir el na cuntegna betg pli bacterias u autra rauba che fa vegnir malsaun) e tuttina restan anc 20% da ses pais oriund. Var 27’000 tonnas ad onn.
Quellas cuntegnan anc ils metals – sco per exempel chapitschas da segirezza dad in chalzer da lavur, la penna dad in canapé u adina puspè ina massa da chazzettas e padellas, grazia a las diversas trophies da ramassar puncts dals detaglists gronds. Tut las restanzas brischadas vegnan dustadas, per exempel a Rueun Plaun Grond, zavrada e lura deponida là.