Var 100'000 tonnas rument brischa la GEVAG a Trimmis onn per onn. In quart resta dentant enavos sco tschendra. Ed en questa tschendra èn da tuttas sorts metals che na brischan betg. Per exempel er aur ed argient. Gia uss vegnan blers da quests metals gudagnads enavos. En futur, davent da la fin 2023, duaja quai dentant succeder bler pli detaglià, declera il mainafatschenta da la GEVAG , François Boone.
Reciclar dapli grazia ad in partenari turitgais
Per reciclar en il futur dapli restanzas lavura la GEVAG en futur ensemen cun la ZAV Recycling SA a Hinwil. Questa firma vegnia anc da reciclar bler pli pitschnas parts da metal, che quai ch'i saja pussaivel a Trimmis, di François Boone. Radund 23'000 tonnas tschendra duai en il futur vegnir transportada mintg'onn fin a Hinwil. Per che tut funcziuna datti er midadas tar la GEVAG a Trimmis. Ins stoppia per exempel midar il sistem cun divers novs implants.
17,7 milliuns francs investescha la GEVAG en quest project. Sch'ins mira sin ils daners, na saja quai betg in project da gudogn, dentant er betg in da sperdita, declera François Boone. Mo cun la reducziun da las emissiuns da CO2 da 88'000 sin 80'000 tonnas ed il gudogn da dapli metal saja quai, la fin finala, tuttina in project che rendia.