Saja quai professiunalmain u betg – sco instrucziun, tutorial u prelecziun per students – emprender via YouTube è dumandà. Era ils scolars e las scolaras da la 4avla classa da la scola chantunala Zug emprendan cun quest portal da video. Però quant empermettent è questa furma d’emprender propi e tge dischavantatgs porta ella? La classa dal gimnasi a Zug ha fatg la prova sin l’exempel e producì agens videos d’instrucziun cun material da scola actual. Ils videos chattais sin ses chanal da YouTube
Zavrar il graun da la paglia
Tenor il studi da la Scola auta turitgaisa per scienzas applitgadas (ZHAW) dovran quatter da tschintg scolars YouTube per emprender. Per il pedagog da medias Thomas Merz porta l’utilisaziun dal portal da video avantatgs mo era dischavantatgs per l'emprender: YouTube porscha in'enorma massa da material da video. Tar la tschertga sparpaglian ins spert ina giada. Ultra da quai dovri bler temp per zavrar il graun da la paglia e da distinguer la nunvardad da la vardad.
Pli veglia che la scrittira
Guido Berger, redactur digital da SRF è persvadì dal success d’emprender cun videos sco med d’instrucziun. Tutorials per emprender insatge, tocs explicativs per chapir in tema meglier: YouTube porscha tut.
Il success dal portal da video mussa quant damanaivla ed intuitiva che questa furma d’emprender audiovisuala è per nus carstgauns. Perquai che l'explitgar a bucca ed il mussar è bain pli vegl che la scrittira.
Avis didactics
Sco metter en la pratica ideas filmicamain? Sco scriv’ins in script? Co tagl’ins e sonorisesch’ins ina registraziun da film? Andreas Pfister scolast gimnasial tar la Scola chantunala Zug mussa en la contribuziun ensemen cun sia classa co ch’ins sa realisar tutorials per videos. Qua porscha el avis didactics e dat enavant sia experientscha, co ch’in tal project pedagogic da medias po vegnir realisà.
Il dossier «YouTube en l’instrucziun» da Beat Küng da la Scola pedagoga a Lucerna declera las pussaivladads da la plattafurma da videos e furnescha in pèr tips co che quels pon vegnir utilisads per l’instrucziun. Plinavant gida il dossier al persunal d’instrucziun da obtegnair/sviluppar cumpetenzas da reflexiun, da valitar, ordinar e verifitgar contribuziuns da videos.