Tge incumbensa han ils elegids insumma e pertge datti partidas politicas?
En la regenza dal chantun Grischun fan tschintg persunas part. La regenza lavura mintga di per il chantun e sto realisar quai ch’il parlament decida. Mintga quatter onns elegia il pievel lur regenza. Elegì vegn quel u quella che fa las bleras vuschs. Mintga commembra u commember è lura responsabel per in departament.
Paula vul far carriera ed ir en la regenza
Paula è commembra dal parlament Grischun u cussegl grond, sco quel vegn era numnà. Ussa vul ella far in pass enavant ed ir en la regenza dal Grischun. Per far quai dovra ella l’agid da sia partida. Tge è ina partida e tge sto ella tut far per daventar cussegliera guvernativa? E tge ha ina regenza insumma da far?
La regenza e sia lavur
Mintga quatter onn elegian las grischunas ed ils grischuns che dastgan votar tgi che cumonda a Cuira. Quai cun eleger il parlament e la regenza. Mo tge fa per exempel la regenza?
En la regenza dal chantun Grischun èn tschintg persunas. Quellas tschintg persunas vegnan era numnadas cusseglieras u cussegliers guvernativs. Ina dad els è il schef u sco ch’i ha num uffizialmain; il president u la presidenta da la regenza. Suenter in onn surpiglia mintgamai in auter dals cussegliers guvernativs quest pensum.
Entant ch’il parlament (en il Grischun vegn quel era numnà cussegl grond) decida davart tge leschas che duain valair en il chantun e per tge ch’ils daners dal chantun vegnan duvrads, ha la regenza da guardar che quai capitia era. La regenza ha pia da guardar che las leschas vegnan tegnidas en e ch’ils daners vegnan dads ora tenor las decisiuns dal parlament.
Cunquai ch’i dat fitg bleras leschas datti era blera lavur e perquai vegn quella lavur partida si en differents champs. Mintga cusseglier guvernativ ha in champ nua ch’el u ella è responsabel. Quels champs vegnan numnads departaments. Ils singuls departaments èn lura anc ina giada partids en differents uffizis. En quels uffizis lavuran lura blera glieud che sa gida cun lur schefs, las cusseglieras ed ils cussegliers guvernativs.
Ils tschintg departaments:
Departament d'educaziun, cultura e protecziun da l'ambient
Quai è il departament ch’è per exempel responsabel che mintga uffant e giuvenil po ir a scola u lura era per la che l’ambient na vegn betg tschufragnà.
Departament da finanzas e vischnancas
En quai departament è l’uffizi ch’incassescha la taglia e guarda da las finanzas dal chantun. In auter uffizi è responsabel per las vischnancas. Quai vul dir, ch’el sa gida tranter auter cun las vischnancas, sche quellas han problems.
Departament da giustia, segirezza e sanadad
Quest departament è responsabel per dretgiras, praschuns u lura era per la polizia. En quest departament chatt’ins dentant era tut quai che ha da far insatge cun spitals u cun la sanadad.
Departament da construcziun, traffic e selvicultura
En quest departament vegn per exempel guardà ch’i dettia vias en il chantun e che quellas èn en in bun stan. L’uffizi s’occupa dentant era cun il guaud e guarda che quel vegn tgirà endretg.
Departament d'economia publica e fatgs socials
L'uffizi ch'è responsabel per ils purs è da chattar en quest departament. In’auter uffizi guarda ch’ins chatta en butia u lura era en l’ustaria da magliar ch’è en urden.
- Quants circuls datti e tge circul dastga trametter quantas persunas en il parlament grischun? Las respostas chattais qua...
- Infurmaziuns davart las partidas dal parlament Grischun e daco ch'i dat insumma partidas politicas, quai pudais leger cun cliccar qua...