La Svizra n’ha nagins retgs e naginas reginas. Tar nus regian ils politichers. L'atun 2015 elegia il pievel svizzer tgi che duai reger en Svizra ils proxims 4 onns. La Svizra survegn in nov parlament, novs cussegliers naziunals e cussegliers dals chantuns. Co sa cumpona il cussegl naziunal, co il cussegl dals chantuns? Pertge datti duas chombras? E co vegn la Svizra atgnamain regida?
CusseglierAs federalAs
Per avair urden en in pajas dovri insatgi che cumonda. Pli baud regnava in retg sur in pajas e guardava per urden. En singulas pajas è quai anc adina uschia. En Svizra è quai auter. Il chastè è la chasa federala a Berna. Il retg è il cussegl federal. En Svizra èn quai set persunas, ils cussegliers federals. Dentant tge fan cussegliers federals e cusseglieras federalas insumma?
Pertge fa in cusseglier federal insumma?
Politbox
I dat ina app per telefonins e tablets che sa numna Politbox. Là chatt'ins infurmaziuns sur da la politica en general.
Tgi vegn, tgi va?
Vulais savair co che las ultimas elecziuns èn idas ora e tge che marscha uschia en la Chasa federala? Sutvart pudais dar in sguard enavos e guardar cura che tgi è vegnì elegì en il Cussegl federal.
05-12-2018: Viola Amherd è elegida
Cun 148 vuschs ha l'Assamblea federala elegì la cussegliera naziunala dal Vallais sco successura da Doris Leuthard. Quai en l'emprim scrutini. La Vallesana Viola Amherd ha persvadì dapli parlamentarias e parlamentaris en Chasa federala, uschia ch'ella succeda a Doris Leuthard.
05-12-2018: La favurita Karin Keller-Sutter è elegida
Cun 154 vuschs ha l'Assamblea federala elegì la cussegliera dals chantuns Karin Keller-Sutter sco successura da Johann Schneider-Ammann. La politicra songagliaisa ch'ha dapi il cumenzament dal cumbat valì sco favurita è vegnida elegida gia en l'emprim scrutini.
20-09-2017: Ignazio Cassis è vegnì elegì sco cusseglier federal
Il tessinais Ignazio Cassis è elegì sco 117. cusseglier federal. Il medi remplazza cunquai Didier Burkhalter che sa retira la fin d'october. El è vegnì elegì cun 125 da 244 vuschs valaivlas. L'elecziun è succedida senza disturbis, quai aifer in zic dapli ch'ina ura.
14-12-2012: Alain Berset è vegnì elegì en il cussegl federal
Mesemna ils 14 da dezember èsi puspè stà uschè lunsch ed il parlament ha gì d'eleger il cussegl federal. I n'ha betg dà grondas midadas. Dals sis cussegliers federals che vulevan tegnair lur uffezi èn tuts vegnids reelegids. Nov en il cussegl federal è vegnì elegì Alain Berset da la Partida populara (PPS). Per ils proxims quatter onns vegnan quels cussegliers federals e quellas cusseglieras federalas a sa fatschentar cun las fatschentas da noss pajais.
29-12-2011: Co va quai cun las elecziuns dal cussegl federal?
La Svizra na vegn betg regnada d'in retg u d'ina regina mabain da set cussegliers federals. Quai savain nus gia. Ma co vegn propi decidì tgi che dastga esser en il cussegl federal?
02-10-2010: Dispita en la chasa federala
Betg be uffants han mintgatant dispita, era creschids. Tranter ils cussegliers federals e las cusseglieras federalas po quai per expempel esser pervi dals differents departements. Ils cussegliers federals ch'eran fin ussa han dastgà tscherner emprim il departement ch'els vulevan. Ils dus novs han pia gì da prender ils departements ch'èn restads. Quai ha chaschunà ina dispita.
22-09-2010: Elecziun da dus novs en il cussegl federal
Mesemna, ils 22 da settember 2010, ha l’assemblea federala elegì ils successurs dals cussegliers federals Moritz Leuenberger e Hans-Rudolf Merz. Johann Schneider-Amman e Simonetta Sommaruga èn da nov en il cussegl federal. Qua ils 7 cussegliers federals e cusseglieras federalas actuals.
