Curt avant Nadal van bab e la mamma a cumprar in pignol da Nadal. Els tschentan si il pignol da Nadal per che l’entira famiglia possia decorar el cun cullas da tut las colurs, lametta, stailas da strom, chandailas u dultscharias. Pignols da Nadal na vegnan betg mo tschentads si en stivas e baselgias, els sclereschan era or en il liber.
Pertge avain nus in pignol da Nadal?
Tge fiss Nadal senza in pignol da Nadal? Per ils blers tutga in pignol da Nadal simplamain tar Nadal. Mo pertge insumma? Danunder vegn questa tradiziun?
Affittar in pignol? L'emprim però als plantar e laschar crescher
Pignols da Nadal natirals
Il pli custaivel pignol da la Svizra è il pignol da Swarovski. Quel pon ins contemplar al martgà da bambin en la staziun da Turitg. Il pign è 15 meters auts e decorà cun 15’000 cristals da la fatschenta Swarovski. Cun questa decoraziun custa il pign passa in milliun francs (1’000’000.-)
Il pli grond pign da la Svizra sa chattava en il Grischun, numnadamain a Luven en la Surselva. Il pign cun il num “la panera” ch'era var 250 onns ed 47 meters auts è vegnì derschì la fin dal 2018.
Il pli grond pign decorà sco pignol da Nadal è stà ina douglasia da 67.4 meters. Quella sa chattava l’onn 1950 a Seattle en ils Stadis Unids da l’America.
Ils Americans han declerà la segund auta planta dal mund sco il pignol da Nadal da la naziun americana. La planta gigantesca da 82 meters sa chatta en il parc naziunal Kings Canion en la California. Ella ha radund 1’650 onns e sch’ins less embratschar ella dovr’ins almain 33 persunas per far quai.
In pignol per il Minisguard
Durant il temp avant Nadal èsi da cumprar ubain resgiar in pignol da Nadal. Tge fiss Nadal senza il pignol? Perquai ha era il Minisguard sa fatg sin la tschertga d'in pignol da Nadal.
Il destin dal pignol da Nadal
Da Nadal fa il pignol simplamain part al maletg en nossas stivas. E tar blers resta el anc là almain fin Bavania, la festa dal Trais Sontgs Retgs. Ma lura èsi finì ed il pignol da Nadal fa ses davos viadi. Il Minisguard fa visita a Vnà per guardar nua ch’il davos viadi dal pignol va là.
Pignols da Nadal artifizials
En la Germania datti il pli pitschen pignol da Nadal dal mund. Quel è mo 14 millimeters aut, uschè aut sco 7 zulprins in sin l’auter. El è illuminà e decorà sc’in dretg pignol da Nadal. Vesair el pon ins en la vitrina d’ina galaria d’art a Dortmund.
In dals pignols da Nadal ils pli custaivels è quel da la bischutaria Ginza Tanaka a Tokio en il Giapun. Quel è numnadamain cumplettamain d’aur. Ils lavurers han duvrà passa 4 mais da tschentar si il pignol d'aur che paisa 12 kilos e custa bunamain 2 milliuns francs (1’850’000.-).
Sin il martgà da Nadal a Dortmund vegn bajegià mintg’onn in pignol da Nadal artifizial da 45 meters. Sin in fundament d’atschal vegnan fixads 1’700 pignols pitschens, uschè ch’i dat in pignol da Nadal gigant. Quel paisa 30 tonnas ed è ornà cun 40’000 chazzolas.
Il pli aut pignol da Nadal che noda en l’aua sa chatta a Rio de Janeiro en l’America dal Sid. La construcziun d’atschal è 85 meters e paisa 542 tonnas, quai è circa uschè grev sco 540 elefants. Decorà è il pignol cun passa 3 milliuns pairs electrics.
A Gubbio, en l’Italia, datti in pignol da Nadal ch’è 800 meters auts e 400 meters lads. Ils abitants han creà cun 250 glischs verdas il muster d’in pignol da Nadal sin la muntogna Ingino. Endadens dal pignol glischan anc ina giada 250 glischs da tuttas colurs. Per ch’il pli grond pignol da Nadal artifizial dal mund sclereschi dovri 12 kilometers cabels.
Rockefeller en la citad da New York
22 meters autezza, 30’000 chazzolinas cun 8 kilometers cabel, ed ina staila da cristal da 3 meters diameter sin il spitg. Quai èn las cifras che circumscrivan in dals pli enconuschents pignols da Nadal da l’entir mund. Il pignol u en quest cas plitost il pign al center da Rockefeller en la citad da New York. Onn per onn admiran millis e millis persunas quest imposant pignol. Dapi l’onn 1933 pon ins contemplar mintga onn en quest lieu in pignol da Nadal.
Dortmund en Germania
En Germania a Dortmund vegn era mintg’onn plazzà in grond pignol. Quel ha in’autezza da 45 meters. Il pign n’è dentant betg creschì uschia, sco quai ch’el sa preschenta là. El è vegnì construì ord 1700 pignols pigns. L’entir pignol paisa 30 tonnas e 40’000 chazzolinas oneschan quel. Sin il spitg sa chatta in anghel da var 4 meters.