Maletgs nauschs, commentaris maligns, gie schizunt manzegnas dovran en l’internet mo in per clics per sa derasar. Els cuntanschan spert in grond public. Sche quellas maltscheccadads pertutgan ina persuna, sa quella strusch pli stizzar ses profil. Anzi, la denunziaziun maligna sin l’internet - il cybermobing - cuntinuescha savens fin che geniturs, scolasts, u schizunt la polizia intervegn.
Taschair è nagina schliaziun
Unfrendas dal cybermobing na vulan betg discurrer da lur nauschas experientschas. Ellas teman da vegnir attatgadas anc dapli. Duas mattas curaschusa èn tuttina sa decididas da discurrer en il Minisguard da lur cas sin facebook – pertge dir nagut fa insumma betg meglra la situaziun.
147...
...è in numer per uffants e giuvenils per telefonar e raquintar da problems. Sche giuvenils han problems pon els discutar quai anonim per telefon, chat, sms u mail. Nus faschain ina visita a Berna tar 147 e mussain co che quella lavur funcziuna precis.
