Suenter il giat è il chaun l’animal ch’ins chatta il pli savens en ils tegnair chasa dals svizzers. En mintga 7avel tegnair chasa viva numnadamain in chaun. Ils ins han chauns gronds, ils auters pitschens. Il pli grond chaun chatt'ins era en il cudesch da records.
Il pli grond
Il pli grond chaun dal mund è in doc che ha num “Giant George”. U per rumantsch George gigantic. Sch’el stat sin duas chommas è el uschè grond sco in giugader da basket, numnadamain passa 2 meters. El paisa 111 kilos.
Il pli pitschen
Il pli pitschen chaun dal mund è "Heaven Sent Brandy", in chihuahua. El paisa gnanc 1 kilo ed è mo uschè auts sco ina cuppa da coca cola. Chihuahuas n’èn betg uschè derasads tar nus.
A Danis viva dentant in da quels exemplars tar la famiglia Montalta. Nus avain visità il chihuahua Joey e sia patruna Daniela Montalta per guardar, co ch’els vivan ensemen.
Lavar il chaun en la maschina da lavar
Schampunar e lavar, quai è per in animal ina pitschna catastrofa. Possessurs da chauns pudessan raquintar bleras istorgias tar quest tema. Ils blers chauns na laschan betg gugent schampunar, lavar e frisar. Quai che tuna plitost sco ina sgnocca, datti uss per propi: ina maschina da lavar chauns.
Chauns sin l’aissa da surf
Tunar, tuni curius. In chaun che va sin l’aua cun in’aissa da surf... Ma sco quai ch’i para pensan ils chauns: «quai che mes patrun sa sai jau era...» e gia èni sin l’aua e chavaltgeschan sin las undas. En il sid da la California datti schizunt ina concurrenza per chaus che van sin l’aua cun l’aissa da surf.
Chauns ed uffants
Nus avain visità uffants che treneschan mintga mesemna cun lur chauns e guardà co ch’els vegnan a frida cun lur chauns.