Il matg levan las buccarias or dal sien d’enviern e sgolan da planta per magliar feglia. Ils purs n’han dentant betg uschè grond plaschair da las buccarias. Avant che quellas sgolas vivan ellas numnadamain sco coss en il terratsch e maglian là las ragischs.
![Buccaria Giuanna sin maun](https://www.rtr.ch/static/cms/images/960w/7bb811.jpg)
Quai è la buccaria Giuanna. Ella ha trais onns e per l’emprima giada vesa ella il sulegl. Enfin oz ha ella vivì sut la terra. Dacurt è ella sa chavada ord la terra e sco emprim sgola ella tar plantas. Là maglia ella fin ch’il venter è plain.
![buccarias sin plonta](https://www.rtr.ch/static/cms/images/960w/501fb7.jpg)
Cun il venter plain sgola Giuanna enturn enfin ch’ella chatta il Giachen. Quel plascha ad ella uschè bain, ch’els sa decidan da fundar ina famiglia.
![Buccarias fan amur](https://www.rtr.ch/static/cms/images/960w/9e6b18.jpg)
Uss sgola Giuanna enavos tar il lieu nua ch’ella è naschida. Là chava ella ils ovs en il terratsch.
Èn las buccarias ina giada sa chavadas ord la terra, na vivan ellas ditg. U ch’ellas vegnan magliadas d’in inimi, sco per exempel, in corv, in erizun u forsa in misarogn. Ni ch’ellas ston murir suenter radund in mais.
![Erizun](https://www.rtr.ch/static/cms/images/960w/cc37b2.jpg)
![Misarogn](https://www.rtr.ch/static/cms/images/960w/7ac5b1.jpg)
![Tgapper](https://www.rtr.ch/static/cms/images/960w/ec3fdc.jpg)
![Coss](https://www.rtr.ch/static/cms/images/960w/e7f6af.jpg)
En il fratemp èn ils ovs da Giuanna en il terratsch, ed ord quels naschan coss.
![Poppa](https://www.rtr.ch/static/cms/images/960w/3efc3c.jpg)
Durant dus onns vivan quels coss en il terratsch, els maglian ragischs per vegnir gronds e ferms. Quai na plascha betg als purs ed als ortulans, pertge senza ragischs na datti nagin bun pastg. Suenter quels dus onns, sa mumifitgeschan ils coss e restan anc in enviern en il terratsch. La primavaira vegnan las buccarias ord las poppas.
![pitschnas buccarias](https://www.rtr.ch/static/cms/images/960w/fd0887.jpg)
Las 25 buccarias, ils uffants da Giuanna sa chavan ord il terratsch e sgolan tar plantas per sa nutrir. Quellas buccarias fan ussa exact il medem sco quai che la mamma Giuanna ha fatg avant trais onns.