Quels grassins regordan mai a Nadal, l’atmosfera d’advent, las glischs e l’esser ensemen cun la famiglia.
Metter a frestg: pasta 1 ura / biscuits 15 min.
Coier: 6-8 min.
Las ingredienzas
- 250 g paintg
- 125 g zutger
- 2 tp zutger da vaniglia
- 1 presa sal
- 1 alv d‘ov
- 350 g farina
- ca. 200 g gelé u confitura d’uzuas nairas, froslas, oranschas, apricosas, ...
tp = tschadun pitschen
Pass per pass
- Metter il paintg en ina cuppa. Agiunscher il zutger ed il sal e maschadar la massa, enfin ch’ella è clera.
- Maschadar l’alv d’ov en la massa. Suenter agiuntar la farina e furmar ad ina pasta.
- Laschar la pasta cuvrida per circa 1 ura en la frestgera.
- Prender ora la pasta da la frestgera ca. 30 min. avant che elavurar la pasta.
- Purziunar la pasta e metter tranter in satget da plastic per zullar ora la pasta sin ina grossezza da 2mm.
- Furar or biscuits cun in diameter da 4 fin 5 cm. Tar la mesadad furar ina rusna amez il biscuit.
- Coier ils biscuits entamez il furn prestgaudà sin 200°C chalira sura/sut per 6–8 min. e laschar sfradentar
Emplenida
- Stgaudar il gelé /la confitura en ina padella e truschar fin che l’emplenida è glischa.
- Reparter sin ils funs (biscuits senza rusnas).
- Springir in zic pulvra da zutger sin ils viertgels e metter quels sin ils funs.
