Zuoz - Festa da lutga da mats e giuvenils a Zuoz cun nov record

Cirill Krieg da Buttikon en il chantun Sviz ha gudagnà en la categoria la pli veglia la festa da lutga da mats a Zuoz. En la lutga finala ha el battì Sämi Moser da Mutten.  

Victorias indigenas hai entant dà en las categorias pli giuvnas. En la categoria fin tredesch onns ha gudagnà Fadri Bardill da Pragg-Jenaz, en la categoria fin indesch onns Niclas Dönz da Pany ed en la categoria fin nov onns Magnus Caduff da Morissen.

La festa da lutga da mats a Zuoz ha ina lunga tradiziun. La festa ch'ha cumenzà fitg pitschna è creschida durant stgars dus decennis a la pli gronda festa da lutga da mats da la regiun. Il success da la lutga da mats en l'Engiadin'Ota è era stà responsabel per la fundaziun da la Societad da lutga engiadinaisa l’onn 2011. Suenter ina vaira euforia a l’entschatta cun numerus amis da lutga ch'èn s'annunziads sco commembers da la societad è quai vegni durant ils ultims onns pli quiet en la societad da lutga. La festa da lutga da mats dentant e creschida cuntinuadamain.  

Impressiuns da Zuoz

Nov record da participants

Cun stgars 120 uffants e giuvenils en la vegliadetgna d'otg fin quindesch onns è la festa da lutga da mats vegnida adina pli gronda. Anc mai han tants uffants e giuvenils fatg part a la lutga sco quest onn. Da la festa da lutga da mats a Zuoz fan part giuvens lutgaders da l’entir chantun Grischun, però era da la societad da lutga March-Höfe da la Svizra Centrala e da la societad da lutga Zürichsee Rechtes Ufer.

Quatter engiadinais a la partenza

Da l’atgna societad da lutga ha il manader tecnic Jon Fadri Carpanetti nominà quatter giuvens lutgaders: Andri Enz da Ftan, Dario Hässig da Lavin, Fadri Thomas dad Ardez e Severin Pua da Sent. Enz ha terminà la lutga en sia categoria sin plazza 18, Hässig sin plazza 17, Thomas sin plazza 13 e Pua sin plazza 9.