Success istoric per la societad da tir «Voluntaria Trun». Las tiraduras e tiradurs da la Cadi che sajettan cun la buis d'aria sin la distanza da 10 meters fan per l'emprima giada il pass en la liga naziunala A, la pli auta liga svizra. A partir da la proxima stagiun che cumenza l'atun pon la Voluntaria Trun uschia cumbatter tranter las meglras 8 equipas svizras ed uschia per il titel da campiun svizzer en questa disciplina.
Avant exact 20 onns era la societad da tir Voluntaria Trun sa part l'emprima giada al campiunadi da tir cun la buis d'aria sin la distanza da 10 meters. Successivamain ès ella s'avanzada cun sia emprima equipa ed uss, suenter dus decennis, dastgan ils da Trun sa mesirar cun ils megliers tiradurs svizzers en questa categoria.
La Voluntaria Trun po mirar enavos sin ina grondiusa stagiun. En la liga naziunala B ha la giuvna equipa battì tut ils set adversaris ed er la fin d'emna passada a Näfels en il chantun Glaruna n'han ils tiradurs da la Cadi laschà nagina schanza a la concurrenza. En il final per la promoziun definitiva per la liga naziunala A ha la Voluntaria Trun battì Wettingen-Würenlos.
A l'equipa che vegn trenada da Baseli Tomaschett fan part Annina, Elena, Andri e Nicolas Tomaschett, Chris Wolf e Leandro Petschen. Plinavant fan era part a quest'equipa tiraduras d'ordaifer. Quai èn Alicia Beer da Rueras, Anja Cadalbert da Sevgein, Chiara Weishaupt da Degen e Martina Herrli da Tavau. Pliras e plirs dad els han appartegnì ni appartegnan anc adina a caders da la Federaziun svizra da tir. Cun Annina Tomaschett schizunt ina en il cader naziunal.
Or da l'archiv:
Annina Tomaschett sajetta era en il cader naziunal.
