L'unihockeyana grischuna Corin Rüttimann sa retira da la squadra naziunala svizra d'unihockey. Quai scriva la Federaziun d'unihockey svizra - swiss unihockey - sin sia pagina d'internet. La sportista da 32 onns ha giugà 141 giadas per la naziunala svizra, la davosa giada il december passà al campiunadi mundial a Singapur, nua che las Svizras eran vegnidas quartas. Rüttimann è cunquai la giugadra cun ils pli blers gieus per la naziunala svizra. Vitiers vegn che la Grischuna ha sajettà uschè blers gols e fatg uschè blers puncts da score sco nagin'autra giugadra en l'istorgia da la squadra naziunala svizra, numnadamain 137 gols e 224 puncts da score.
En tut è Rüttimann stada ad 8 campiunadis mundials. Ella ha gudagnà duas giadas argient e quatter giadas bronz cun la naziunala svizra.
Sch'ella cuntinuescha sia carriera sco giugadra en in club è anc avert. La stagiun passada ha Rüttimann giugà per Zug United.