L'equipa da Murat Yakin ha mussà ina prestaziun solida encunter la Brasilia, oravant tut defensiv. Enavant è percunter ì pauc, las schanzas da gol èn stadas raras. Curt avant la fin èsi lura reussì als Brasilians da mitschar tras la defensiun dals Svizzers, quai cun in'acziun sco ord il cudesch. Suenter ina grondiusa cumbinaziun sur Vinicius e Rodrygo ha Casemiro tutgà spectacular al 1:0. La Svizra n'è betg pli vegnida da reagir.
Durant che la Brasilia ha cuntanschì definitiv la fasa da k.o. na dastga la Svizra betg perder en il davos gieu da gruppa encunter la Serbia. Vegn il Camerun però betg da batter ils Brasilians tanscha als Svizzers er in pari encunter ils Serbs per far il pass en l'otgavelfinal.
Al davos campiunadi mundial il 2018 en Russia aveva la Svizra battì la Serbia cun 2:1 entras dus gols da Granit Xhaka e Xherdan Shaqiri. Il gieu Svizra – Serbia è il venderdi saira a las 20:00 temp svizzer.
Public viewing a Cuira
Radund 200 fans èn sa scuntrads en la Postremise per sustegnair la squadra naziunala da ballape. Cun in raclette e biera speravan ils fans sin ina partida captivanta.
Ils organisaturs èn stads fitg cuntents cun la saira. Blers fans, bleras emoziuns e buna luna en il public viewing a Cuira.
La Seleção senza Neymar – la prevista
Svizra – Brasilia, quest duel hai gia dà al davos campiunadi mundial avant quatter onns en Russia. Lura avevan ils Svizzers giugà pari cun 1:1. La Brasilia vala sco il grond favurit, er sin il titel da campiun mundial. I fiss il 6avel titel per la Seleção. Encunter la Svizra ha la Seleção perencunter stuì vegnir a frida senza lur superstar Neymar ch’è sa blessà vi d'in pe.
Buna bilantscha cunter la Brasilia
Questa giada hani pers, ma la Svizra na sto betg sa zuppar da la Brasilia. En ils nov duels avant oz èsi reussì als Svizzers da gudagnar duas giadas e da giugar quatter giadas pari. Per in ulteriur success n'hai dentant betg tanschì. Per in giugader èsi plinavant stà in gieu tut spezial, per Xherdan Shaqiri che po dar ses 11avel gieu cun la Svizra ad in campiunadi mundial, quai munta in record per in giugadur svizzer.
Per ils Brasilians è stà cler tgi che gudogna
La Brasilia ha sco la Svizra lantschà a moda optimala il campiunadi mundial da ballape en il Qatar. Ed avant il duel cun ils Svizzers èn ils fans brasilians er da buna speranza ch’i tanschia da batter l’equipa da Murat Yakin.
