Il super-G è la disciplina da parada da Stefan Rogentin. E vi da quella cursa da Wengen ha el er bunas regurdientschas. Avant quasi exact in onn, ils 13 da schaner 2023, è el vegnì segund, davos il Norvegiais Aleksander Aamodt Kilde ed avant ses collega d’equipa Marco Odermatt. Mussar ina tala cursa briglianta sco avant in onn, quai è la finamira da Rogentin ch’ha gia mussà diversas giadas ch’el sa senta bain sin la pista legendara dal Lauberhorn al pe dad Eiger, Mönch e Jungfrau.
Partenza per il super-G da Wengen è a las 12:30 uras. Stefan Rogentin parta cun il numer 4, dus numers suenter l’auter Grischun, Gino Caviezel che parta gia cun il numer 2. Ils dus gronds favurits, Marco Odermatt parta cun il numer 10 ed Aleksander Aamodt Kilde cun il numer 13.
