Suenter las cursas dad Adelboden è Wengen uss en roda. La festa da skis en la Part Sura Bernaisa po pia cuntinuar. Las cursas dal Lauberhorn al pe dad Eiger, Mönch e Jungfrau valan onn per onn sco in dals puncts culminants en la cuppa mundiala da skis. Sper la cursa rapida da Kitzbühel è quella dal Lauberhorn pli probabel il grond classicher insumma.
Quest onn spetgan schizunt duas cursas rapidas al Lauberhorn. La gievgia vegn prendì suenter ina cursa rapida da Beaver Creek ch’era vegnida annullada il december pervia da la mal’aura. Questa cursa rapida vegn dentant scursanida in zic. Pir la sonda stat sin il program la legendara cursa rapida sin la pista originala. Il venderdi vegn manà atras in super-g e la dumengia va la cuppa mundiala da skis a Wengen a fin cun in slalom.
Trais cursas – trais schanzas per Odermatt
Il grond favurit per las cursas spertas, pia per las duas cursas rapidas ed il super-g, è Marco Odermatt. Il skiunz da 26 onns dal chantun Sutsilvania emprova da finalmain gudagnar a Wengen sia emprima cursa rapida insumma da la cuppa mundiala. Quai è reussì ad el fin oz sulet al campiunadi mundial l’onn passà a Courchevel Méribel. En la cuppa mundiala è el stà pliras giadas fitg datiers, savens han dentant be paucs tschientavels mancà.
E savens è el era stà classà davos Aleksander Aamodt Kilde, il Norvegiais che vala sco ses pli grond rival en questa disciplina. Er il 2022 ed il 2023 è Odermatt mintgamai vegnì segund al Lauberhorn davos Kilde. En ils trenaments ha Odermatt dentant gia demonstrà sias ambiziuns. En l’emprim trenament è il Svizzer stà il pli spert.
Rogentin vul salvar l'onur grischuna
Ord vista grischuna va sulet Stefan Rogentin a la partenza da las cursas rapidas. Enfin uss n’ha Rogentin dentant betg propi pudì persvader en questa stagiun. A Wengen survegn el ina nova schanza. En l’emprim trenament ha il skiunz da Lai mussà ch’el è pront cun ses segund plaz. E che Rogentin sa senta bain a Wengen ha el era gia mussà ils davos onns. Avant dus onns er’el vegnì 8avel en la cursa rapida e l’onn passà vegnì segund en il super-g, fin oz ses sulet plaz da podest en la cuppa mundiala.
Program da cursas al Lauberhorn:
- Gievgia, ils 11 da schaner a las 12:30 cursa rapida scursanida
- Venderdi, ils 12 da schaner a las 12:30 super-g
- Sonda, ils 13 da schaner a las 12:30 cursa rapida dal Lauberhorn
- Dumengia, ils 14 da schaner a las 10:15/13:15 slalom
