Aleksander Kilde da la Norvegia po sa legrar duas giadas: El gudogna il super-G en sia patria a Kvitfjell avant il Canadais James Crawford e l'Austriac Matthias Mayer. Cun la victoria gudogna el avant il final da la cuppa mundiala a Courchevel er la culla da cristal pitschna. Marco Odermatt – fin avant la cursa concurrent direct per la culla da cristal – n'ha betg pudì persvader. El ha pers 1,68 secundas sin Kilde e terminà la cursa be sin plazza 28, gist davos ses collega d'equipa Ralph Weber.
Meglier Svizzer è Beat Feuz sco 5avel. Gist davos Feuz ha Justin Murisier persvadì sco 6avel. Cun Niels Hintermann sco 9avel ha er il victur da l'emprima cursa rapida a Kvitfjell anc fatg il pass sut ils top 10.
Nagin exploit dals Grischuns
Ina buna prestaziun ha er Stefan Rogentin mussà. Il skiunz da Lai ha pers bun ina secunda sin Alexander Kilde ed è uschia vegnì 13avel. Ina cursa d'emblidar èsi percunter stà per l'auter skiunz da Lai, Gino Caviezel. El ha pers bunamain trais secundas e manchentà cleramain in plaz sut ils top 30.
Il podest
- Aleksander Aamodt Kilde (NOR), 1:25,91 minutas
- James Crawford (CAN), +0,07 secundas
- Matthias Meyer (AUT), +0,12
Las cursas dals trais pli sperts
Il classament dals Svizzers
- 5. Beat Feuz, +0,31 secundas
- 6. Justin Murisier, +0,71
- 9. Niels Hintermann, +0,84
- 13. Stefan Rogentin, +1,07
- 27. Ralph Weber, +1,63
- 28. Marco Odermatt, +1,68